Од асистент ЧетГПТ може да се претвори во моќна рекламна машина

Најавите дека четбот-платформите воведуваат реклами означуваат можна пресвртница во користењето на вештачката интелигенција како масовна услуга. На пример, компанијата „Опен еј-ај“ (OpenAI) започна со објавување реклами во најпопуларниот четбот ЧетГПТ (ChatGPT) на 9 февруари годинава, како дел од тест-фаза.

На својата веб-страница компанијата посочува дека за време на тест-периодот, реклами може да им се појават на логирани корисници на пакети Free и Go во САД. 

„Рекламите нема да се појавуваат на акаунти каде што некој ни кажува - или ние предвидуваме - дека корисниците имаат помалку од 18 години“, се наведува во соопштението.

Во него се додава и дека за пакетите со повисока претплата како Plus, Pro, Business, Enterprise и Edu нема да бидат воведени реклами.

Ова претставува голема промена бидејќи досега корисничкото искуство, дури и за оние со пониски претплати, беше релативно едноставно: разговор без визуелни прекини, без спонзорирани објави и без комерцијални интервенции во самата комуникација. Тоа создаде впечаток дека овие системи функционираат како неутрални дигитални асистенти, фокусирани исклучиво на содржината од прашањето.

 Разговорите со четбот често содржат информации што се споделуваат во доверба, без намера да бидат јавни. Depositphotos

Со воведувањето реклами, се отвора дилема дали овој модел може да го задржи таквиот впечаток. Промената не би се однесувала само на изгледот на интерфејсот туку и на начинот на кој се гради односот меѓу корисникот и платформата. Во услови кога четботовите стануваат алатка за работа, учење, па во некои случаи и за донесување одлуки, секој комерцијален елемент добива поголема тежина отколку во класичен онлајн простор.

Довербата како најчувствителна точка

Прашањето за приватноста е едно од најзначајните во оваа дискусија. Разговорите со четбот често содржат информации што се споделуваат во доверба, без намера да бидат јавни. Тоа создава високо ниво на очекување за заштита и дискретност.

Никола Бурагев, главен уредник на порталот за технологија „Конект“, укажува дека токму начинот на кој би се користеле податоците ќе биде пресуден за перцепцијата на корисниците.

„Апсолутно постојат потенцијални ризици, и тука клучното прашање е довербата. Алатките како ЧетГПТ досега ја градеа својата позиција врз основа на корисничката доверба и перцепција за неутралност. Доколку рекламниот модел се базира на анализа на приватни разговори, тоа отвора сериозни прашања околу приватноста, обработката на податоци и транспарентноста“. 

Овде не станува збор само за технички безбедносни механизми туку и за јасна комуникација кон јавноста. Корисниците мора да знаат што се случува со нивните податоци, под кои услови се користат и со каква цел. Без таква јасност, секој обид за монетизација може да биде доживеан како нарушување на довербата.

Луѓето во четбот внесуваат информации што често се поинтимни од она што би го пребарувале на класичен онлајн пребарувач. Ако тие податоци станат основа за целно рекламирање, ризикот не е само технички, туку и етички. 

„Ќе биде клучно компаниите јасно да дефинираат како се користат податоците и да овозможат вистинска контрола за корисниците“, посочува Бурагев.

Промена на улогата на четботовите

Четботовите се развија како алатки за директна интеракција, каде што корисникот поставува прашање и добива одговор без посредници. Токму таа едноставност ја изгради нивната популарност. Во моментот кога во тој процес се воведува реклама, динамиката неизбежно се менува.

Бурагев ја истакнува разликата меѓу четботот како асистент и класичниот медиумски простор.

„Четботовите се доживуваат како асистенти, не како медиуми. Кај класичните дигитални медиуми корисникот очекува реклами. Кај ВИ-асистентите очекува директен, функционален одговор.“

Oваа разлика е клучна бидејќи ја дефинира психолошката рамка на очекувањата. Доколку рекламата влијае врз содржината на одговорот, дури и суптилно, може да се појави сомнеж во објективноста. Затоа, начинот на интеграција ќе биде исто толку важен како и самото постоење на рекламниот формат.

Од друга страна, една од причините зошто рекламите во четботовите се разгледуваат како позитивна можност е напредната способност на вештачката интелигенција да разбира контекст. За разлика од традиционалните модели што се потпираат на претходно собирани податоци, ВИ-системите можат да анализираат што се случува во конкретниот момент од разговорот.

Тоа отвора нова димензија на целење.

„Вештачката интелигенција драматично ќе ја продлабочи персонализацијата на рекламите. ВИ-системите можат да ги разберат контекстот и намерата на корисникот во реално време, што овозможува многу попрецизно насочување“, вели Бурагев.

Никола Бурагев Приватна архива

Тоа значи дека рекламата нема да се темели само на тоа кој сте, туку што точно ви е потребно во конкретниот момент. Четботовите имаат способност да препознаат во која фаза на донесување одлука се наоѓа корисникот и да понудат релевантни производи или услуги во тој контекст, што технолошки овозможува многу попрецизно насочување од сè што сме виделе досега.

Таквата прецизност може да биде корисна ако се користи како контекстуална препорака, но истовремено ја зголемува одговорноста на платформите. 

„Доколку нема јасна транспарентност, јасно означување и контрола од страна на корисникот, ваквото прецизно целење може да предизвика отпор наместо доверба“, предупредува нашиот соговорник. 

Колку е пософистициран системот за целење, толку поголема транспарентност е потребна за да се зачува довербата.

Баланс меѓу деловното и корисничкото искуство

Имплементацијата на реклами нема да зависи само од технологијата туку и од обликувањето на корисничкото искуство. Начинот на кој тие ќе бидат прикажани, нивната фреквенција и јасноста на означување ќе влијаат врз тоа дали ќе бидат прифатени или одбиени.

Бурагев нагласува дека пристапот мора да биде внимателен и транспарентен.

„Можните негативни реакции ќе се менаџираат преку јасна транспарентност, избор и внимателен дизајн на искуството. Ако рекламите влијаат врз одговорите или го нарушуваат текот на разговорот, реакцијата ќе биде силно негативна“.

Во тој контекст, иднината на рекламите во четботовите ќе зависи од тоа дали тие ќе бидат интегрирани како дополнителен, јасно одвоен елемент или како дел од самата логика на одговорите. Токму таа разлика ќе ја одреди перцепцијата на корисниците.

Конечно, дебатата околу рекламите во четботовите не се сведува само на тоа дали ќе се појави нов формат на огласување, туку на тоа како ќе се дефинира улогата на вештачката интелигенција во дигиталниот екосистем. Доколку овие системи останат примарно алатки за продуктивност, знаење и поддршка, нивниот комерцијален модел ќе мора да биде дизајниран така што нема да ја наруши основната функција. Довербата што е еднаш изгубена, тешко се обновува, особено кај технологија што се темели на континуирана интеракција и личен контекст.

Истовремено, не може да се игнорира фактот дека развојот и одржувањето на напредни ВИ-системи бараат значителни ресурси. Поради тоа, компаниите ќе продолжат да бараат одржливи модели на монетизација. Прашањето е дали рекламите ќе бидат интегрирани како транспарентен елемент или ќе станат дел од самата логика на одговорите. Токму од таа одлука ќе зависи дали четботовите ќе останат неутрални дигитални асистенти или постепено ќе се трансформираат во нова генерација медиумски платформи.

Во таа смисла, иднината на рекламите во четботовите нема да биде одредена само од технолошката можност туку и од изборот на вредностите што ќе го следат нивниот развој. Транспарентноста, контролата од страна на корисниците и јасните етички стандарди ќе бидат клучни параметри. Ако тие бидат испочитувани, можно е да се воспостави рамнотежа меѓу иновацијата и довербата. Ако не, ризикот е новата комуникациска форма да ја изгуби својата најсилна предност - чувството дека разговорот е слободен, корисен и насочен кон личноста, а не кон пазарот.