За една година од девизните резерви ‚исчезнаа‘ 820 милиони евра

Доаѓа ли период во кој Северна Македонија ќе биде принудена со заеми да го брани стабилниот курс на денарот односно да обезбеди девизна ликвидност е прашање што заслужува сериозно внимание откако беа објавени новите податоци за нивото на девизните резерви и за трговската размена на земјава.

Според податоците на Народната банка, на крајот на мај 2022 година, официјалните девизни резерви изнесуваат 3,18 милијарди евра, што е намалување за 56,8 милиони евра во однос на април, годинава. Статистиката открива континуиран пад на резервите. Од април, 2021 до мај 2022 година тие се намалени за 820 милиони евра.   

Од друга страна, Државниот завод за статистика објави дека вкупната вредност на извозот на стоки од Северна Македонија, во периодот јануари – април 2022 година, изнесува 2,62 милијарди евра и бележи пораст од 15,1 отсто во однос на истиот период од претходната година. 

Вредноста на увeзената стока, во истиот период, изнесува 3,92 милијарди евра, што е за 27,3 отсто повеќе во споредба со истиот период од претходната година. Трговскиот дефицит, во периодот јануари – април 2022 година, изнесува 1,30 милијарди евра.

Очигледно е дека новите зголемени цени на енергенсите и на храната го „билдаат“ увозот во земјава и истовремено ја зголемуваат побарувачката за девизи со кои компаниите-увозници купуваат струја, нафтени деривати и храна од странство.

Во економската теорија се смета дека девизните резерви се во сигурна зона доколку можат да покријат четиримесечен увоз. Ако се погледнат најновите трендови станува јасно дека сегашното ниво на резервите е помало отколку увозот во првите четири месеци од годинава.

Од Народната банка во повеќе наврати во изминатиов период уверуваат дека курсот на денарот е стабилен и дека постојат  инструменти за обезбедување на девизна ликвидност како на пример репо-линијата од ЕЦБ во износ од 400 милиони евра. Станува збор за финансиски инструмент кој обезбедува брз пристап на Народната банка до дополнителна ликвидност во евра, директно од ЕЦБ, во замена за соодветен колатерал деноминиран во евра.

Доколку продолжи забревтаниот раст на цените на енергенсите и храната на меѓународните пазари, а пред се поради воените дејствија во Украина може да се очекува дека монетарната власт ќе биде принудена прв пат да ја искористи оваа можност од ЕЦБ за да ја одржи макрофинансиската стабилност. 

 

   

Во моментов нема коментари за веста. Биди прв да коментира...

Остави коментар