ББА-анализа: Македонскиот берзански индекс највисок во регионот и пошироко

Берзанските индекси во регионот Адрија забележаа постојан раст, поттикнат од силната економска експанзија во повеќето области, освен во БиХ, каде што индексите во моментов се сметаат за преценети, констатираат од аналитичкиот тим на „Блумберг Адрија“ во новата анализа на пазарите на капитал во регионот, објавена на „Блумберг Адрија инсајт“.

„Овој раст во голема мера им се припишува на зголемената продажба и подобрените маржи кај котираните компании“, велат аналитичарите.

Од друга страна, тие посочуваат дека кај цените на обврзниците има своевидно лебдење од почетокот на 2024 година до денес, што е одраз на нестабилноста на инфлацијата и доцнењето во очекуваното намалување на каматните стапки.

„Како резултат на тоа, орочените депозити станаа попривлечна опција, која има корист од зголемувањето на пасивните каматни стапки, покрај краткорочните фондови на пазарот на пари“, велат аналитичарите.

Тие информираат дека повеќето берзански индекси во регионот Адрија продолжија да растат во 2024 година.

Од  почетокот на годината до денес МБИ (MBI) и СБИТОП (SBITOP) имаат најдобри перформанси, со раст од 19 проценти и 15,4 проценти, соодветно, а следени се од БЕЛЕКС (BELEX15), со раст од 14 проценти, и КРО10 (CRO10), кој бележи раст од 10 проценти.

„Растот на МБИ е поттикнат од банкарскиот сектор, кој сочинува 43 проценти од вкупниот индекс. Во првиот квартал од 2024 година, трите најголеми банки во Македонија забележаа просечен раст од 24 проценти на годишно ниво кај нето-приходите од камати“, укажуваат од нашиот аналитички тим.

Оттаму додаваат дека перформансите на СБИТОП во голема мера ѝ се припишуваат на НЛБ, која е на пат да го удвои својот бизнис до 2030 година и сè уште одржува поволно вреднување.

„БЕЛЕКС15 беше под влијание на стекнувањето малцински акции од страна на „Месер“, која сочинува 20 проценти од индексот. Силните перформанси на КРО10 може да му се припишат на робусното враќање на ’Кончар’ (+39 проценти), поради историски високите финансиски резултати и новите нарачки“, велат аналитичарите.

Тие констатираат дека единствените индекси што бележат пад се БИРС(BIRS) и САСХ10 (SASX10) во БиХ поради превреднување и неликвидност.

„Кога се разгледува поширокиот регион, српскиот, словенечкиот и македонскиот индекс ги надминаа и индексите во регионот на ЦИЕ и поширокиот СТОКС50 (STOXX50)“, посочуваат аналитичарите.

Од нашиот аналитички тим информираат дека спротивно на очекувањата, нема продолжување на падот на приносите на државните обврзници во однос на крајот на 2023 година.

„Позитивното расположение за стеснување на приносите стивна поради недоволно јасното намалување на стапката на инфлација, што го одложи почетокот на намалувањето на каматните стапки од страна на централната банка (на пр. силата на пазарот на трудот и стабилноста на економиите). Сите овие фактори се рефлектираа и на приносите на обврзниците на регионот Адрија, кои се зголемија од почетокот на годината досега“, велат аналитичарите.

Тие додаваат дека приносот на Хрватска порасна најмногу, за речиси 50 б.п., додека приносот на Србија минимално порасна поради позитивното расположение на инвеститорите поврзано со инвестицискиот рејтинг, кој доби позитивна перспектива.

„Сличен тренд е забележан во регионот на ЦИЕ, како и во периферниот дел на ЕУ (Шпанија и Португалија), освен кај романскиот принос, кој падна малку од почетокот на годината до денес. Со оглед на атрактивноста на приносот, тоа не е изненадувачки - Романија има повисок кредитен рејтинг од Србија и повисок принос, што ја одразува долгорочната фискална недисциплина“, објаснуваат аналитичарите.

Според нив, растот на референтните каматни стапки овозможи враќање на заборавените инструменти на пазарот на капитал како што се краткорочните инвестициски фондови на пазарот на пари и краткорочните парични ЕТФ-ови.

„По зголемувањето на каматните стапки од страна на ЕЦБ, одреден вишок ликвидност се влеа во споменатите фондови. Во текот на последните три години, 10,7 милијарди американски долари се прелеаја во краткорочните ЕТФ-ови со географски фокус на пазарот на пари во Европа, што е 62 проценти од вкупните средства на пазарот на пари управувани од ЕТФ-овите“, посочуваат аналитичарите.

Тие додаваат дека годинава приливот во овие фондови е дополнително поттикнат од малку задоцнетиот почеток на намалување на каматните стапки.

„Од друга страна, кога каматните стапки ќе почнат да паѓаат, очекуваме одлив од средствата на пазарот на пари и прераспределба кон обврзници што нудат повисоки приноси од пазарот на пари или депозитите“, велат аналитичарите.

За втората половина од 2024 година, тие очекуваат продолжување на солидните перформанси на пазарот на акции во регионот Адрија.

„За обврзниците очекуваме мал пораст на цената, со оглед на очекуваниот почеток на намалување на каматните стапки. Доколку инфлацијата значително опадне, можни се почести намалувања, што би поттикнало дополнително зголемување на цените на обврзниците“, велат аналитичарите.

Тие сметаат дека последните пораки од ЕЦБ де факто велат дека за првото намалување на каматните стапки за 25 б.п. е веќе одлучено да биде на следната седница во јуни 2024 година.

„По тоа, до крајот на годината, очекуваме стапките да се намалат за дополнителни 75 б.п., што ќе влијае на намалување на 3-месечниот и 6-месечниот Еурибор на 3 проценти до крајот на 2024 година“, велат аналитичарите.

Во моментов нема коментари за веста. Биди прв да коментира...

Остави коментар