„Енвидија“ е новото злато, велат инвеститорите

Најголемите американски технолошки компании не само што се добар избор за оние што сакаат да се обложуваат на технолошки развој туку инвеститорите ги гледаат и како средство за заштита од инфлација, покажува истражувањето.

Златото, кое со векови е познато како една од најбезбедните инвестиции, инвеститорите сè уште го доживуваат како најсигурна алатка против растот на цените. Вкупно 46 отсто од инвеститорите гласаа за благородниот метал, но речиси една третина од инвеститорите рекоа дека инвестирањето во големи технолошки компании во САД е добра заштита од инфлација.

Одговорите ја покажуваат улогата на компаниите како „Енвидија“, „Амазон“ и „Мета“ на американските финансиски пазари. Нивното влијание врз целата економија полека но сигурно се шири. Како резултат на тоа, овие компании остварија високи профити, а инвеститорите веруваат дека тие трендови ќе продолжат.

Bloomberg

Инфлацијата во САД нагло опадна од рекордните нивоа во 2022 година, но ги надмина очекувањата на економистите во првите три месеци од годината и останува постојано над целта на Федералните резерви од два процента.

Тоа е причината зошто зголемувањето на цените е во голема мера најголема грижа на инвеститорите. Мнозинството испитаници во истражувањето - 59 проценти од 393 - ја наведоа забрзаната инфлација како најголем ризик со кој се соочуваат финансиските пазари отсега до крајот на годината. Следниот извештај за потрошувачките цени е закажан за в среда и најверојатно ќе биде околу 3,4 отсто.

„Енвидија“, на пример, се зголеми во вредност повеќе од шест пати откако инфлацијата првпат се искачи над два процента во март 2021 година. Нивната цена се зголеми за околу 50 отсто, додека индексот S&P 500 напредуваше за 30 отсто. Сепак, како и другите акции во раст, технолошките компании се чувствителни на промените во инфлацијата и каматните стапки, бидејќи нивните вредности се многу зависни од идните профити.

Околу една четвртина од испитаниците ја посочиле рецесијата во САД како најголем ризик во 2024 година. Во тој случај државните благајнички, наместо акциите, би понудиле подобра заштита, покажува истражувањето.

Bloomberg

Изненадувачката отпорност на економијата, и покрај построгата монетарна политика на Фед, го задржа приливот на пари во САД, каде што приносите на обврзниците се високи, а корпоративниот профит продолжува да расте.

Тој прилив дополнително го зајакна американскиот долар, кој повеќето аналитичари го сметаат за најдобра валута за турбулентните времиња на пазарите.

Речиси три четвртини од испитаниците изјавиле дека доларот е најдобрата валута за заштита, при што швајцарскиот франк добил околу 23 отсто од гласовите, а јапонскиот јен околу шест пати помалку. Кај испитаниците од САД и од Канада, доларот добил 86 отсто од гласовите, додека во Европа 43 отсто од учесниците се изјасниле за швајцарската валута.

Јенот го загуби статусот „рај за инвеститори“ поради депрецијацијата во однос на доларот и олабавената монетарна политика на Јапонија, покажа истражувањето. Зголемениот јаз меѓу каматните стапки во Јапонија и САД го турна јенот на најниско ниво од 1990 година на почетокот на годинава.

Златото поскапе за речиси 15 отсто годинава, а Народната банка на Кина е еден од најголемите купувачи. Со конфискацијата на средствата во руски долари по војната во Украина, многу земји се обидуваат да го диверзифицираат доларот. Само 13 проценти од испитаниците на истражувањето „МЛИВ Пулс“ (MLIV Pulse) изјавиле дека биткоинот напредувал поради овие случувања.