.webp){kind=icon}
Помладите возрасни во Австралија сè повеќе ги прифаќаат услугите за купување сега, а плаќање подоцна, при што повеќе од 40 отсто од лицата на возраст од 18 до 39 години се задолжиле за плаќање на рати во изминатата година, што е нагло зголемување во однос на бројката во 2019 година, покажуваат податоците на централната банка на Австралија.
Севкупно, речиси една третина од возрасните Австралијанци ja користеле можност за купување сега, а плаќање подоцна во изминатите 12 месеци, што е за околу 8 процентни поени повеќе од 2019 година, покажа истражувањето на Банката врз основа на Анкетата за плаќања на потрошувачите во 2022 година.
Во просек, клиентите кои користеле одложено плаќање имале две различни сметки, според истражувањето спроведено кај речиси 1.000 луѓе, кое за прв пат собрало податоци за бројот на сметки кои клиентите ги имале кај различни даватели на услуги.
Податоците обезбедуваат увид во навиките на потрошувачите поврзани со одложеното плаќање, индустрија која порасна во популарност од пандемијата. Услугите обезбедени во апликациите на компаниите како „Афтерпеј“, „Афирм Холдингс“ и „Кларна Бенк“ и кои обично нудат заем без камата што се отплаќа на рати, може да биде корисен за луѓето кои сакаат да избегнат зголемување на каматните стапки на кредитните картички. Сепак, тие беа критикувани дека водат до неодговорно трошење и поттикнуваат проблеми со долгот.
Во мај, австралиската влада рече дека планира да го регулира овој начин на плаќање според законите за заеми, што значи дека ќе мора да се придржува до одговорните обврски за заеми, да поседува австралиски кредитни лиценци и да се соочи со низа минимални стандарди за однесување и производи.
Истражувачкиот труд на централната банка на Австралија покажува дека потрошувачите со пристап до повеќе сметки за одложено плаќање би можеле да ја поттикнат конкуренцијата на пазарот, бидејќи провајдерите се натпреваруваат да ги привлечат потрошувачите да ги користат нивните услуги.
Сепак, бидејќи компаниите кои нудат ваков тип на плаќање обично не им дозволуваат на трговците да ги префрлат високите трошоци за прифаќање на нивната услуга директно на клиентите, оние што не користат вакви услуги би можеле да бидат тие што на крајот ќе ги субвенционираат клиентите кои плаќаат со одложување бидејќи цените на стоките и услугите генерално растат, се вели во истражувањето.
Документот, исто така, покажа дека помладите потрошувачи почесто користат дебитни картички, додека постарите потрошувачи почесто користат кредитни картички и готовина за плаќање. Според извештајот, оние помлади од 30 години извршиле повеќе од три четвртини од нивните плаќања со дебитни картички.
Готовинските трансакции продолжија да паѓаат во сите возрасни групи, тие сочинуваат 13 отсто од сите плаќања на потрошувачите, што е намалување од 27 отсто во 2019 година, се вели во извештајот.
