„Ситигруп“ станува новата финансиска база за богатството на Трамп

По години одбивање од страна на големите банки, парите на американскиот претседател Доналд Трамп најдоа ново прибежиште: „Ситигруп“ (Citigroup Inc).

Синот на американскиот претседател Ерик Трамп станал клиент на третата најголема американска банка, во која основал фонд каде што сега ќе се чува дел од богатството на неговиот татко, велат добро упатени извори. 

Ерик Трамп/Фотограф: Кена Бетанкур/(Bloomberg)

Соработката почнала уште во ноември лани, откако извршната директорка Џејн Фрејзер му се јавила да му честита на претседателот Трамп за изборната победа. Новиот фонд е чувствителна тема во рамките на банката, која разгледувала како да го ограничи пристапот до информациите само на неколку клучни вработени – како што се шефот на управување со богатство Енди Зиг, кој всушност ги водел разговорите со Ерик Трамп, и Кент Лакен, банкар на „Ситигруп“ задолжен за соработката, велат некои од соговорниците.

Од неподготвеноста на многу банки да го обезбедат неговото богатство, Доналд Трамп бил сериозно иритиран, поради што годинава тој јавно ги нападна „Џеј Пи Морган Чејс“ (JPMorgan Chase & Co.) и Банката на Америка“ (Bank of America Corp.), тврдејќи дека ги одбиле неговите пари. (Двете банки изјавија дека не одбиваат деловни односи врз идеолошка основа.) Во август тој изјави за Си-ен-би-си (CNBC) дека на крајот морал да им се обрати на помали банки низ целата земја.

Портпарол на „Ситигруп“ одби да коментира. Одговор не пристигна ниту на барањето за коментар до организацијата „Трамп“ (Trump Organization), семејната компанија за недвижности во која Ерик Трамп е главен извршен директор.

Доналд Трамп ги префрлил своите средства во фонд што може да се укине кога првпат стапил на функцијата. Пред неговото враќање во Белата куќа, Трамп во истиот фонд додал и акции од „Трамп медија енд технолоџи“ (Trump Media & Technology Group Corp.), матичната компанија на Трут соушал (Truth Social). Со овој фонд управува неговиот постар син, Доналд Трамп Џуниор. Фондот што беше формиран во „Ситигруп“, со нивниот татко како корисник, досега не беше обелоденет, а неговата вредност останува непозната.

„Личните средства на претседателот се во фонд управуван од неговите деца и немаат никаква врска со неговите претседателски одлуки“, изјави портпаролката на Белата куќа, Ана Кели, без да го коментира новиот договор.

Банките го одбиваа Трамп поради неговите претходни неуспеси да врати заеми поврзани со проблематични бизнис-зделки. По нападот на неговите поддржувачи врз Капитол на 6 јануари 2021 година, некои од банките што дотогаш му останаа лојални, ја прекинаа соработката. Подоцна тој и семејната компанија се соочија со граѓанска тужба за измама поднесена од јавниот обвинител на Њујорк, која вклучуваше и обвинувања дека ја довеле во заблуда „Дојче банк“ (Deutsche Bank AG) додека земале кредити. Трамп се бореше против тој случај и прогласи „целосна победа“ откако апелациски суд ја поништи финансиската казна.

Дел од своите деловни активности Трамп префрли во „Аксиос фајненшл“ (Axos Financial Inc.), позната по т.н. кредитирање врз основа на исклучоци – соработка со клиенти чии околности би ги одвратиле конкурентите.

Семејни врски

Оваа година, пак, повеќе банки сигнализираа подготвеност да воспостават соработка, а некои од нивните директори приватно стапиле во контакт со семејството Трамп, наведува лице запознаено со разговорите. Процесот се забрзал откако организацијата „Трамп“ во март ја тужеше „Капитал уан фајненшл“ (Capital One Financial Corp.). Организацијата, од своја страна, ја обвини „Капитал уан“ дека ја прекинала децениската соработка единствено поради политички мотиви – тврдење што банката го негира.

За Фрејзер, развојот на сегментот за управување со богатството е централна точка во планот за долгорочно зајакнување на „Ситигруп“. Оваа банка, пак, наедно се соочува и со зголемени трошоци додека работи на исполнување на барањата на Федералните резерви и Канцеларијата за контрола на валутата за зајакнување на внатрешните системи и контроли.

Федералните резерви и Федералната канцеларија за контрола на валутата ја казнија „Ситигруп“ со речиси 136 милиони долари во средината на 2024 година, поради бавниот напредок во подобрувањето на управувањето со податоци и ризици. Компанијата соопшти дека интензивно работи на исполнување на регулаторните налози, кои бараат понатамошни подобрувања. Бавното темпо во спроведувањето понекогаш предизвикува загриженост кај акционерите. 

Годинава акциите на „Ситигруп“ се најуспешни меѓу најголемите американски банки, со раст од 40 отсто.

Извршната директорка Фрејзер и првиот човек на Банката на Америка, Брајан Мојнихан, беа поканети да присуствуваат на државната свечена вечера во Обединетото Кралство по повод дипломатската посета на Трамп минатиот месец. Настанот, со 160 гости, беше одржан во замокот Виндзор, под покровителство на кралот Чарлс Трети.

Џејн Фрејзер/Фотограф: Валери Плеш/(Bloomberg)

Според распоредот за седење, во што „Блумберг“ имал увид, таа била сместена до Николас Луна, заменик-шеф на кабинетот во Белата куќа. Луна е во брак со поранешна асистентка на зетот на Трамп, Џеред Кушнер – чие семејство исто така имало деловни односи со „Ситигруп“. Лакен, банкарот на Ерик Трамп во „Ситигруп“, е поранешен дипломат во Стејт департментот и повеќе од две децении работи во банката. Некое време се повлекол од функцијата за да биде советник во претседателската кампања на Мит Ромни во 2008 година – кој подоцна стана еден од политичките противници на претседателот Трамп. Роден во Ајова, Лакен помогнал и во организирањето на кампањата на Ромни во 2012 година во таа држава.

Нагло зголемување на богатството

Богатството на Доналд Трамп нагло се зголеми во последниве години, зголемувајќи го и потенцијалот за заработка на неговите банкари.

По започнувањето на изборната кампања во 2024 година, низа нови проекти со криптовалути, партнерства во недвижности и други вложувања на неговото семејство помогнаа неговото богатство да се удвои – на 7,7 милијарди долари, покажува индексот на милијардери на „Блумберг“. Неговите синови повеќепати изјавија дека искуството на „дебанкирање“ (кога банките прекинуваат соработка) ги поттикнало да влезат во криптобизнисот.

Одделите за управување со богатство во инвестициските банки можат да им понудат широк спектар услуги на сопствениците на компании, во зависност од тоа како сакаат да ги користат своите удели. Фирмите може да организираат заеми со акции или да посредуваат при продажба на големи пакети акции, за да се избегне пад на нивната вредност на пазарот.

Децении порано, компании што подоцна станаа дел од „Ситигруп“ претрпеа загуби во работењето со Трамп. Пред огромното спојување во 1998 година што ја создаде сегашната структура на банката, некои од нејзините претходници го финансираа Трамп за проекти што пропаднаа – вклучувајќи заеми за недвижности и за краткотрајната авиокомпанија „Трамп шатл“.

Во двата случаја „Ситибанк“ била наведена меѓу најголемите кредитори.

Во моментов нема коментари за веста. Биди прв да коментира...

Остави коментар