Владата на Саудиска Арабија инвестира 38 милијарди долари во потенцијалот на земјата да стане следниот центар за индустријата за видеоигри. Како дел од својата стратегија да ја диверзифицира економијата од нафтата, Саудиска Арабија преку својот фонд за јавни инвестиции сака да стане голем играч на глобалниот пазар на игри, вреден 184 милијарди долари.
Откако првично се фокусира на индустријата за е-спорт, која имаше проблеми, подружницата на фондот, „Сави гејмс“ (Savvy Games Group), сега сака да развива, објавува и купува врвни игри и да ја поддржи индустријата за игри во Ријад.
„Сега сме повеќе компанија за е-спорт отколку компанија за игри. Тоа што го правиме оваа година е повеќе да се фокусираме на објавување и развој на игри“, изјави главниот извршен директор на „Сави“, Брајан Вард, во интервју за „Блумберг њуз“ (Bloomberg News).
Плановите на „Сави“ се амбициозни на преполниот пазар, каде што долгогодишните играчи, како „Електрик артс“ (Electronic Arts Inc), отпуштаат вработени. Но фондот веќе инвестираше повеќе милијарди долари во компании за игри како „Нинтендо“ (Nintendo Co), „Тенсент“ (Tencent Holdings Ltd) и „Аквизишн близард“ (Activision Blizzard Inc). Вард планира да ги искористи тие врски за да го изгради работењето на „Сави“.
Фондот во февруари го зголеми својот удел во „Нинтендо“ на 8,3 отсто, станувајќи најголем надворешен акционер. Саудиска Арабија нема речиси никаква трага во глобалниот развој на игри. Но брзорастечката популација на гејмери во земјата го наведе Вард, поранешен извршен директор во „Електроник артс“ (Electronic Arts), „Аквизишн“ (Activision) и „Мајкрософт“ (Microsoft Corp), да се пресели во Ријад и да го води „Сави“.
„Дел од нашиот мандат е да им помогнеме на партнерите и другите компании да дојдат во Саудиска Арабија и да го изберат Ријад наместо некое друго место за да основаат издавачка дејност или бизнис за дистрибуција што ќе му служи на регионот“, рече тој.
Според аналитичарите на „Нико партнерс“ (Niko Partners), во земјата има приближно 21 милион гејмери. Тоа е околу 58 проценти од населението, што не е многу помалку во споредба со 66 отсто, колку што има во САД. До 2026 година пазарот на игри на Блискиот Исток и Северна Африка се очекува да порасне за 56 отсто, до 2,79 милијарди долари.
„Сосема е логично една влада што размислува за иднината да фокусира барем одреден дел од својот инвестициски опсег во овој сектор. Саудиска Арабија дејствува со чувство на итност и сака да биде пред другите земји во што е можно повеќе значајни зделки“, рече Серкан Тото, извршен директор на консултантската групација „Кантан гејмс“ (Kantan Games Inc).
Во 2022 година „Сави“ направи сензација во конкурентниот свет на игри откако ја купи ЕСЛ (ESL), компанијата за турнири во е-спорт, и ја спои со платформата за игри „Фејсит“ (Faceit), како дел од заеднички договор во вредност од 1,5 милијарда долари. Во март „ЕСЛ Фејсит“ (ESL Faceit Group) ја купи компанијата за е-спорт технологија „Виндекс“ (Vindex) за необјавена сума.
Е-спортот доживеа бум во 2018 година, кога доби рекордни инвестиции од 4,5 милијарди долари, а потоа, во 2022 година, пресушија инвеститорите и спонзорските фондови. Многу компании за е-спорт беа принудени на откази или затворање, не успевајќи да остварат профит на десетици милиони обожаватели што можеби ги гледаат настаните на интернет, но трошат многу малку пари за индустријата, сметаат од компанијата „Њузу“ (Newzoo), која го истражува пазарот.
Иако „ЕСЛ Фејсит“ (ESL Faceit) сè уште не е профитабилна компанија, Вард верува во способноста индустријата за е-спорт да заработи пари со консолидирање на помали играчи.
„Ангажманот во е-спортот сè уште не е на ниво. Тоа е фантастично, само што монетизацијата не се совпаѓа со ангажманот“, рече Вард.
.webp){kind=icon}
