text size
Емануел Макрон во понеделникот претстави странски инвестиции во вредност од 15 милијарди евра, кои доаѓаат од „Амазон“ (Amazon.com Inc.), „Мајкрософт“ (Microsoft Corp.), „Морган Стенли“ (Morgan Stanley) и други, за зајакнување на економијата и поправка на јавните финансии во Франција. Исто така идејата е Париз да стане европски финансиски центар по брегзит.
Проектите беа претставени на годишниот самит „Избери Франција“, на кој се собираат 180 директори во палатата во Версај. Настанот, кој сега е седми по ред, е клучен дел од планот на Макрон за реиндустријализирање на земјата и привлекување повеќе странски инвестиции по долг период на економски пад.
Вкупната инвестиција е составена од 56 проекти, во кои се вклучени и „Астра Зенека“ (AstraZeneca), „Еквиникс“ (Equinix), „Ај-би-ем“ (IBM) и производителот на нискојаглеродни ѓубрива „Фертигхај“ (FertigHy), а ги надминува минатогодишните 13 милијарди евра, соопштија од Елисејската палата.
Инаку, самитот се одржува во чувствителен момент за француската економија, која излегува од тежок период на стагнација и висока инфлација. Иако имаше раст на почетокот на годината, послабото производство веќе ја поткопа целта на Макрон да ја врати земјата на целосна вработеност и да го намали буџетскиот дефицит по пандемијата на ковид-19 и енергетската криза.
Патрик Поујан, извршен директор на „Тотал енерџис“ (TotalEnergies SE), ја потресе владата минатиот месец велејќи дека можеби ќе ја премести примарната котација на неговата компанија во Њујорк. И покрај тоа, странските инвестиции беа релативно светла точка. Иако бројот на проекти во Франција се намали минатата година, земјата и понатаму е главната дестинација за глобалните инвеститори во Европа, според рангирањето на консултантската куќа ЕЈ (EY).
Најавени инвестиции
- „Амазон“ ќе потроши 1,2 милијарда евра за зајакнување на капацитетите на е-трговија, логистика и компјутери;
- „Мајкрософт“ планира да потроши четири милијарди евра за изградба на инфраструктурата за облак и вештачка интелигенција;
- „Еквиникс“ ќе инвестира 630 милиони евра, отворајќи 50 работни места;
- „Ај-би-ем“ планира да го прошири истражувањето за квантно компјутерство, инвестирајќи 45 милиони евра;
- КДДИ (KDDI), подружница на „Телехаус“ (Telehouse), треба да одвои една милијарда евра за центри за податоци;
- „Фертигхај“ би сакал да инвестира 1,3 милијарда евра до 2030 година во фабрика за азотни ѓубрива со ниска содржина на јаглерод;
- Германскиот стартап „Лилиум“ (Lilium) е во преговори за изградба на фабрика за монтажа на електрични млазници, вредна 400 милиони евра;
- „Фајзер“ (Pfizer) ќе инвестира 500 милиони евра во текот на пет години, кога станува збор за иновации;
- „Астра Зенека“ ќе потроши 365 милиони евра за проширување на својата локација во Данкерк.
Овие најави го вклучуваат планот на „Амазон“ да потроши 1,2 милијарда евра за зајакнување на логистичкиот и компјутерскиот капацитет, особено во однос на облак-платформата AWS (Amazon Web Services) и ресурсите за вештачка интелигенција (ВИ). Оваа инвестиција се очекува да отвори околу 3.000 дополнителни работни места.
Во фармацевтскиот сектор, „Фајзер“ ќе реинвестира 500 милиони евра во Франција, додека „Астра Зенека“ ќе потроши околу 365 милиони евра во регионот Данкерк (на северот од земјата). „Мајкрософт“ планира да потроши четири милијарди евра за изградба на инфраструктура за облак и вештачка интелигенција, се наведува во соопштението на компанијата, за да обучи милион луѓе и да поддржи 2.500 стартапи до 2027 година. Претходно годинава компанијата откри партнерство со „Мистрал еј-ај“ (Mistral AI) и инвестиција од 15 милиони евра во тој париски стартап, кој се натпреварува со стартапот „Опен еј-ај“ (OpenAI).
Bloomberg Mercury
„Морган Стенли“ го проширува својот европски кампус во француската престолнина преку својот глобален истражувачки центар, изјави во саботата францускиот министер за финансии Бруно Ле Мер. Почнувајќи од 2021 година, американската банка го зголеми бројот на вработени во Париз од 150 на околу 400. Планот е да вработи уште 100 луѓе низ своите оддели во Париз, вклучувајќи го и центарот за истражување и развој, кој моментално има 90 вработени и може да се зголеми на 120, според портпаролот на банката.
„Фрст Абу Даби банк“ (First Abu Dhabi Bank) и нигериската „Зенит банк“ (Zenith Bank) исто така ќе отворат канцеларии во Париз, што треба да им помогне на француските компании да инвестираат во Заливот и Африка (англиско говорно подрачје) и да покажат дека Париз станува клучна локација за играчи низ светот, според Ле Мер.
Бруно Ле Мер
Bloomberg Mercury
Париз во последниве години порасна како финансиски центар, привлекувајќи банки и хеџ-фондови што бараат основа во ЕУ по брегзит. Гласањето на Обединетото Кралство за напуштање на ЕУ во 2016 година ги принуди најголемите банки на Волстрит да ги приспособат операциите и да обезбедат дека европските средства (државни обврзници, каматни производи и акции) се тргуваат во преостанатите 27 земји во блокот.
Меѓутоа, бидејќи протокот од Лондон до Париз неодамна забави, француската влада направи напори да ја зголеми атрактивноста на Париз како европски финансиски центар, со оглед на репутацијата што ја следи целата земја (строги закони за работни односи, прекумерна регулатива и политички притисок врз компании).
Ле Мер во понеделникoт се состана со банкари од најпознатите банки, меѓу кои Џејми Дајмон, извршен директор на „ЏП Морган“ (JPMorgan Chase), Хенри Кравис, еден од основачите на инвестициската фирма ККР (KKR), Дејвид Соломон, извршен директор на „Голдман Сакс“ (Goldman Sachs), и Брајан Мојнихан, шеф на „Банк оф Америка“ (Bank of America).
Се менува во „зелено“
Другите инвестиции што ги презентираше министерот за финансии вклучуваат две фабрики, кои ќе ѝ помогнат на Франција да стане лидер во „декарбонизираната индустрија“. Швајцарската компанија КЛ1 (KL1) ќе инвестира 300 милиони евра во фабрика за преработка на никел (клучна компонента за батерии за електрични возила), со 200 вработени во Бланфорт, во близината на Бордо.
Германскиот стартап „Лилиум“ ќе гради фабрика на југозапад на Франција вредна 400 милиони евра, за склопување електрични млазници што полетуваат вертикално. Таму треба да се отворат 850 работни места, рече Ле Мер.
Европскиот конзорциум „Фертигхај“ планира да инвестира 1,3 милијарда евра до 2030 година во фабрика во северна Франција за производство на азотни ѓубрива со ниска содржина на јаглерод, изјави министерот за индустрија Роланд Лескур во интервју за „Трибун“ (La Tribune) во неделата.
Се очекува и белгиската хемиска групација „Солвај“ (Solvay) на својата локација во Ла Рошел да започне единица за производство на ретки земјени материјали, вредна 100 милиони евра, додаде Лескур.
.webp){kind=icon}
