Работен статус: отпуштен/а и ужива во тоа.
Вакво е расположението на мала, но гласна група луѓе погодени од кратењата на работните места што периодов ги зафатија фирмите од Волстрит до Силициумската Долина.
Отпуштањето е обично една од најголемите кризи во кариерата на еден работник. Но, чудната неусогласеност на денешниот пазар на труд - каде стапката на невработеност падна на најниско ниво од 1969 година во јануари, дури и кога десетици илјади луѓе беа отпуштени од големите технолошки компании како „Гугл“ (Google), „Мајкрософт“ (Microsoft) и „Амазон“ (Amazon) - им олеснува на лицата кои ќе останат без работа.
Тие гледаат порелаксирано на невработеноста, сметајќи ја како начин да побегнат од позициите што не ги сакаат, да посветат повеќе време на своето хоби и на крајот да најдат подобри можности.
Пример за тоа е 26-годишниот Бобин Синг. Тој вели дека неговата прва реакција откако добил известување за отказ од неговата позиција како продуцент за социјални мрежи во компанија за е-спорт во Лос Анџелес била славеничка. Сега се фокусира на фриленс едитирање на видеа, особено во кратка форма, наменети за „Тикток“ (TikTok).
Бобин Синг
Bloomberg
„Мојата новогодишна одлука (анг. New Year’s resolution) беше да работам помалку за да имам повеќе време да правам проекти кои ми се страст“, вели Синг. „Потоа добив тримесечна отпремнина, па помислив: 'Универзумот ме послуша'“.
Слични показатели се појавуваат во новите податоци, особено кај помладите работници. Речиси 20 отсто од генерацијата зед и 15 отсто од милениумците велат дека би биле среќни ако бидат отпуштени денес, според истражувањето спроведено од „Харис Пол“ (Harris Poll) за Bloomberg News минатиот месец.
Светлата страна на отказите
Припадниците на генерацијата зед најчесто реагираат со чувство на среќа
Bloomberg
Прочитајте повеќе: Околу 80 отсто од генерацијата зед сакаат да ја променат работата годинава
Се разбира, комфорните отпуштања се ретка привилегија. Дури и со финансиски тампон, губењето работа може да изгледа страшно, а оние без фонд за итни случаи сигурно се чувствуваат уште полошо. Сепак, за некои, силниот пазар на труд ја отстранува вознемиреноста од отпуштање. Односот на отворени работни места во споредба со невработени лица достигна речиси рекордно ниво од 1,9 во декември, последниот месец за кој се достапни податоци. И повеќе од половина од неодамнешните вработувања ги нашле своите нови позиции во рок од еден месец, според податоците од „Зип регрутер“ (ZipRecruiter), компанија за барање работа и регрутирање преку интернет.
Брз пресврт
Обично, има празнина од недели или месеци помеѓу отпуштањето и почетокот на нова работна позиција. За Џош Ламли, двете се случиле во опсег на една објава на „Линкдин“ (LinkedIn).
43-годишниот регрутер од Џорџија бил отпуштен од „Амазон веб сервисес“ (Amazon Web Services) на 18 јануари. Тој бил ангажиран во помала компанија непосредно пред објавувањето на отпуштањата, па започнал со рабата во понеделникот потоа.
„Кога дознав дека мојата позиција се укинува, ми беше драго што сум отпуштен“, вели тој. „Чувствувам дека добро се вклопувам во новиот тим во кој сум сега“.
Кризата со вработување може да им помогне на луѓето да преземат нови ризици или да ги прифатат промените за кои инаку никогаш не би размислувале, вели тренерот за кариера, Рана Росен.
Со новата позиција Џош Ламли доби можност да работи од дома
Bloomberg
Тоа му се случило на Кејси Клемент, 47-годишник од Шарлот, Северна Каролина, кој бил отпуштен од „Гејм стоп“ (GameStop) во јули. Поранешниот директор за продукт менаџмент изградил долга кариера во фирми како Lowe’s, Sprint и Cellular One. Во сите тие години, тој никогаш не бил отпуштен.
Тој, исто така, никогаш не размислувал да се приклучи на консултантска фирма. Но, тоа е она што го направил откако објавата што ја напишал на „Линкдин“ во врска со неговото отпуштање станала вирална и довела до десетици разговори за неговата професионална иднина и седум понуди за работа.
„Отпуштањето на некој начин ме принуди да гледам од различни агли и да гледам различни можности“, објаснува Клемент, кој сега работи во „Метод“ (Method), компанија за стратешки дизајн и инженерство каде што треба да се фокусира на решавање на проблеми за низа компании.
Кејси Клемент
Bloomberg
Отпуштањето може да ги поттикне луѓето на непозната територија што може да се покаже поисплатлива од нивната претходна кариера, вели тренерот Мајкл Вендерот.
„Слобода“
Џулијана Реден првично имала чувство на загуба кога била отпуштена од голема технолошка компанија во ноември. Уште една лоша работа за неа било тоа што излегува од сериозна врска. Начин да ја преброди ситуацијата: со резервација на билет во еден правец за Гватемала.
Џулијана Реден
Bloomberg
29-годишната девојка завршила со учество во програма која нуди бесплатно сместување во замена за работа на рецепција во хостел. Ја искористила можноста да патува сама, нешто што никогаш порано не го направила. Реден ги посетила пештерите во земјата и градбите на Маите, запознавајќи пријатели од целиот свет. Тоа ѝ дало чувство за перспектива за кое вели дека ја прави посигурна. Кога се вратила, можела да започне со нова работа што ја добила во „Пелотон“ (Peloton) во Њујорк.
„Доживеав голема загуба“, вели таа. „Но, во исто време добив толку многу слобода во мојот живот“.
.webp){kind=icon}
