По рекордното ИПО, „Спејс екс“ влезе во турбуленции

„Спејс екс“ (SpaceX) докажува дека дури и најголемата иницијална јавна понуда (ИПО) досега не е имуна на нестабилноста на цената на акциите што вообичаено ги потресува големите компании по нивното излегување на берза.

Акциите на компанијата на Илон Маск за ракети, сателити и вештачка интелигенција паднаа втор ден по ред, при што во текот на тргувањето во четвртокот загубија до 10,3 проценти, продолжувајќи го падот од речиси 5 проценти забележан во средата. Сепак, „Спејс екс“ и натаму е на пат да ја заврши својата прва целосна недела како јавна компанија со околу 30 проценти повисока вредност од цената од 135 долари по акција од иницијалната јавна понуда.

Според Мајкл Монаган, партнер и портфолио-менаџер во ФФ (Founder Funds) од Далас, кој поседува акции на „Спејс екс“, нестабилноста веројатно ќе продолжи додека инвеститорите ги одмеруваат високите очекувања за идниот раст на приходите без јасно дефиниран пат за нивно остварување.

„Станавме многу уверени во поседувањето на оваа акција затоа што можевме да видиме 200 милијарди долари приходи во 2030 година“, рече тој, посочувајќи дека на други места постојат и повисоки процени. „Но и буквално и фигуративно, потребна ви е ракета за да стигнете до тие приходи.“

Историјата покажува дека тргувањето може да биде многу турбулентно кај ИПО-ата на мегакомпании: просечниот максимален пад од цената на затворање на првиот ден изнесува 55 проценти во текот на првата година на акцијата, според анализа на ТВ (Truist Wealth).

Малите инвеститори, кои во првите неколку дена од тргувањето беа нето-купувачи на акциите на „Спејс екс“, се повлекоа во средата. Нето-приливите беа речиси рамни во поголемиот дел од денот и завршија со скромно нето-купување од 2,3 милиони долари до затворањето на пазарот, покажуваат податоците на ВР (Vanda Research). Тој тренд се пренесе и во четвртокот, кога оваа група инвеститори забележа нето-продажба од 3,5 милиони долари во првите 10 минути од трговската сесија, пред тековите повторно да се стабилизираат и да преминат во позитивна територија.

Bloomberg

Ендрју Бил од АР (Arete Research) во четвртокот започна следење на акцијата со препорака за купување и целна цена од 401 долар, што подразбира повеќе од двојно зголемување во однос на моменталната цена.

„Сметаме дека фундаментите и долгорочниот потенцијал за раст на 'Спејс екс' ќе го поттикнат интересот на инвеститорите“, рече Бил. Иако прогнозира дека компанијата ќе надмине 200 милијарди долари приходи до 2030 година, тој предупреди дека патот до таму нема нужно да биде целосно мазен.

„Вселената е тешка област и роковите може да се пролонгираат поради аномалии при лансирања, технички предизвици, еколошки грижи и многу други фактори, па затоа сите процени треба да се третираат со голема доза претпазливост“, додаде тој.

Во меѓувреме, банкарите на „Спејс екс“ се подготвуваат да одржат разговори со инвеститори за потенцијално издавање обврзници, кое се очекува да изнесува најмалку 20 милијарди долари, објави „Блумберг њуз“, повикувајќи се на упатени извори.

И покрај неколкуте нестабилни трговски сесии, акциите наскоро би можеле да добијат поддршка од вклучувањето во берзански индекси. „Спејс екс“ ќе има право да биде додаден во индексот Nasdaq 100 по 15 дена тргување благодарение на промената на правилата на Nasdaq Inc., која овозможува побрз влез за мегакомпании што излегуваат на берза. Секако, ако „Спејс екс“ биде вклучен во Nasdaq 100, првично ќе има релативно мала тежина во индексот. Сепак, FTSE Russell и MSCI Inc. направија слични измени за да овозможат порано вклучување во нивните индекси.

Како резултат на тоа, околу 30 проценти од слободно достапните акции на „Спејс екс“ се очекува да бидат во сопственост на пасивни инвеститори само две недели по ИПО-понудата, според „Интропик“ (Intropic), компанија што изработува прогнози за ребалансирање на индекси. Таа побарувачка, во комбинација со ограничената понуда на акции - бидејќи договорите за задржување ги спречуваат инсајдерите да продаваат акции со месеци - може да создаде нагорен притисок врз акциите на „Спејс екс“.

„Веќе гледате ЕТФ-ови и други производи што се појавуваат и се обидуваат да фатат некаков облик на изложеност кон 'Спејс екс'“, рече Ен Милети, раководител на инвестиции во акции во АГИ (Allspring Global Investments-. „Не знам дали тоа ќе биде толку драматична промена. Очигледно, инвеститорите што многу се фокусираат на репер индекси, а особено ако се вклучени во секторите на раст или технологија, размислуваат: ‘Како да се позиционирам ако ова навистина влезе во некој индекс?’ Тоа е главната работа што обично генерира дополнителен обем на тргување.“

Иако акциите се под продажен притисок, тие сè уште се на пат да ги надминат просечните резултати во првата недела на тргување на 30 големи американски технолошки ИПО-а во изминатите 15 години, според ТАС (Truist Advisory Services).

„Сè уште има многу шум во тргувањето“, рече Дек Муларки, извршен директор во СЛЦ (SLC Management). „Секогаш ќе постоеше одредено ниво на тактичко купување на оваа акција. И обично се потребни неколку недели за тоа да се исчисти од системот. Затоа сè уште сме во раната фаза на откривање на цената и утврдување на разумен опсег за тргување со акцијата.“