.webp){kind=icon}
Европската банка за обнова и развој (ЕБРД) одобри кредит од 55 милиони евра за српската стартап компанија „HTEC Group“, чие седиште е во Соединетите Американски Држави (САД). Фирмата е специјализирана за софтверско инженерство и развој на дигитални производи. Оваа инвестиција претставува најголемо финансирање од ЕБРД во ИТ секторот до сега во регионот на Западен Балкан.
Во соопштението од ЕБРД пишува дека овој потег следи по неколку претходни аквизиции, кои и тогаш ги поддржала оваа банкарска институција, а кои овозможија „HTEC“ да го зголеми бројот на вработени од 200 на 2.000. Имено, ЕБРД и „HTEC“ прв пат се здружија во 2020 година, кога банката одобри кредит преку фондот за кофинансирање „Enterprise Expansion Fund“ (ENEF), за поддршка на аквизицијата на „HTEC“ со српската ИТ компанија „Execom“.
Најновиот кредит ќе и помогне на компанијата „во натамошното ширење и интернационализација на работата по пат на стратешки аквизиции“, се додава во соопштението. Компанијата, исто така, ќе инвестира во зајакнување на своите услуги и експертизи во својот домен, вклучувајќи и финтек, пишува во соопштението.
„ЕБРД им помага на локалните компании да станат регионални шампиони и исклучително сме задоволни што нашата поддршка помогна „HTEC“ да ја прошири својата работа и да стане една од водечките ИТ компании во регионот и глобален играч во секторот на инженерски услуги“, изјави директорот на ЕБРД за телекомуникации, медиуми и технологија, Дирк Вернер.
Мирослав Виријевиќ, финансиски директор во „HTEC Group“, потврди дека партнерството со ЕБРД во текот на последните две години им помогна да ја имплементираат стратегијата за проширување во регионот. Компанијата, основана во 2008 година, сега е присутна на 29 локации во 7 држави. Како што вели Виријевиќ, целта е да станат најдобра компанија за развој на кариерата во областа на софтверскиот инженеринг и други области во овој регион.
„Се водиме од целта да ги решаваме најкомплексните инженерски проблеми за нашите клиенти и со локалните таленти да креираме глобално конкурентни работи во овој дел од светот“, додава Виријевиќ.
ЕБРД е водечки институционален инвеститор во Србија
Како што порачуваат од ЕБРД, новиот кредит е во согласност со стратегијата на банката да промовира раст на технолошкиот сектор и дигитализација во регионот.
Depositphotos
Според последната стратегија на ЕБРД за Србија за периодот од 2018 до 2023 година, се напоменува дека во приватниот сектор се вработени околу 70 проценти од вкупниот број. На големите компании, според оценката на ЕБРД, им недостига соодветно корпоративно управување, неретко се борат и со големи долгови, што го стеснува пристапот до финансии и го намалува инвеститорскиот капацитет. Од друга страна, меѓу главните предизвици за малите фирми се непредвидливост на деловното опкружување, високи парафискални давачки, а исто така и ограничен пристап до финансии.
„Ниското ниво на профитабилност кај приватните компании укажува на потенцијално големо зголемување на ефикасноста“, се истакнува во документот од банката.
ЕБРД е водечки институционален инвеститор во Србија. Банката досега вложила повеќе од 7,5 милијарди евра во Србија. Лани поголемиот дел од парите биле наменети за приватниот сектор, вклучувајќи финансирање на инвестициите на малите и средни фирми во тргувањето и зелената технологија, кредитни линии за унапредување на енергетската ефикасност во станбениот сектор и наменски кредитни линии за жени претприемачи.
Ставот дека Западен Балкан претставува приоритет, ЕБРД го поткрепува со фактот дека до сега вложиле повеќе од 15 милијарди евра во регионот и продолжуваат да инвестираат повеќе од 1 милијарда секоја година.
