БМВ тргнува во големо кратење на трошоците: 8.000 работни места се на удар

БМВ ќе им понуди доброволни испратнини на илјадници вработени во Германија, во обид да стане поефикасен и поконкурентен во однос на ривалите од Кина.

Според извори запознаени со плановите на компанијата, најголемиот дел од околу 8.000 работни места што БМВ планира да ги укине низ светот ќе се однесуваат токму на Германија. Тоа претставува околу пет отсто од вкупната работна сила на компанијата и е дел од поширокиот бран на реструктурирање на германската автомобилска индустрија, која се соочува со сè поголеми притисоци.

Понудите за доброволно заминување ќе им бидат упатени на вработените во истражување и развој, планирање и други корпоративни функции, додека работниците во производствените погони нема да бидат опфатени со програмата, наведоа изворите, кои сакаа да останат анонимни бидејќи плановите сè уште не се јавно објавени. БМВ исто така планира во наредните месеци да го намали бројот на менаџерски позиции во рамките на поширока реорганизација.

БМВ и другите германски производители на автомобили ги намалуваат трошоците поради падот на продажбата во Кина, американските царини и високите трошоци за производство во Европа. „Фолксваген“, сопственик на брендовите „Ауди“ и „Порше“, планира укинување на повеќе десетици илјади работни места и намалување на производствените капацитети за да одговори на сè посилната конкуренција од кинеските производители, предводени од компанијата БЈД.

Генералниот директор на БМВ, Милан Недељковиќ, и претставниците на работничкиот совет треба да ја претстават програмата за доброволно намалување на бројот на вработени на состанок со вработените во Германија в среда, наведуваат истите извори. Програмата ќе започне во октомври и ќе трае до 2027 година. Портпарол на БМВ потврди дека компанијата постигнала договор со работничкиот совет за програмата за реструктурирање во Германија, но не сакаше да изнесува дополнителни детали.

Милан Недељковиќ Bloomberg

Акциите на БМВ пораснаа за време на тргувањето во Франкфурт до 1,9 отсто, но и натаму се повеќе од една третина пониски отколку на почетокот на годината.

Недељковиќ се обидува да ги намали трошоците по сериозното предупредување за пад на профитот што компанијата го објави минатиот месец. Според изворите, БМВ очекува програмата за доброволни заминувања да придонесе за раст на профитабилноста од 2028 година. Генералниот директор, кој ја презеде функцијата во мај, реагира на наглиот пад на побарувачката во Кина, најголемиот поединечен пазар на БМВ. Комбинацијата од сè посилната конкуренција од домашните производители, предводени од БJД - особено во сегментот на електрични возила - и долготрајната криза на кинескиот пазар на недвижности негативно влијае врз продажбата на сите производители на автомобили во таа земја. Во меѓувреме, истите кинески конкуренти забрзано го шират своето работење и во Европа.

БМВ истовремено се соочува со последиците од војната на Блискиот Исток и американските царини. Компанијата неодамна одлучи годинава да не учествува на Саемот за автомобили во Париз за да ги преиспита своите деловни приоритети. Минатиот месец соопшти дека дополнително ќе ја интензивира веќе постојната програма за намалување на трошоците.

Намалувањето на бројот на вработени во германската автомобилска индустрија претставува скап процес, бидејќи колективните договори и гаранциите за вработените во најголем дел не дозволуваат отпуштања. Поради тоа компаниите мора да нудат високи испратнини за да го намалат бројот на вработени.

 

БМВ на крајот на минатата година во Германија вработуваше 87.436 луѓе, што е повеќе од половина од вкупниот број вработени во светот. Според годишниот извештај за 2025 година, бројот на вработени во земјата веќе бил намален за 2,3 отсто во однос на претходната година. Со програмата за доброволни заминувања БМВ „одговара на колапсот на пазарот во Кина, додека истовремено работи на зајакнување на конкурентноста на своите погони во Германија“, изјави Хорст От, претставник на синдикатот ИГ Метал во Баварија и член на Надзорниот одбор на БМВ. Тој додаде дека колективните договори остануваат во сила.

Договорот на БМВ со претставниците на вработените е постигнат без поголеми судири, за разлика од ситуацијата во „Фолксваген“, каде што извршниот директор Оливер Блуме го очекуваат повеќемесечни и тешки преговори со синдикатите околу планираните мерки за реструктурирање.

Пред да стане генерален директор во мај, Недељковиќ раководеше со производството во БМВ. Компанијата во последните години вложи милијарди евра во развојот на платформата „Ноје класе“, која сега постепено ја воведува на светските пазари. БМВ очекува новите модели да му помогнат поуспешно да им конкурира на производители како „Тесла“ и кинеските автомобилски компании.

Деталните деловни резултати за второто тримесечје БМВ треба да ги објави в четврток.