„Mercedes-Benz AG“ по втор пат годинава ги зголеми очекувањата, а побарувачката и натаму ја надминува понудата, дури и додека економската криза се продлабочува. Силната продажба, посебно на врвните модели и здравите цени ги поткрепуваат позитивните прогнози и покрај големите трошоци за енергија и постојаните проблеми со ланецот на снабдување.
Мерцедес, исто така, извести за скок на добивката пред оданочување во третиот квартал на 5,2 милијарди евра. Германската компанија сега гледа добивка на групацијата значајно поголема отколку прогнозите пред една година, кога се предвидуваше блага добивка.
Секторот за производство на автомобили очекува дека повратот од продажба ќе се зголеми на 15 проценти од претходно проектираните 14 отсто. Мерцедес, исто така, ги зголеми очекувањата и за своите други оддели.
Производителот на лимузини „EQS“ ја решава насобраната побарувачка поради тоа што производството со месеци беше ограничено како резултат на недостигот од полупроводници. Со оглед на тоа дека сега се намалуваат притисоците во ланецот на испорака, вниманието е насочено на тоа колку производителите на автомобили ќе бидат отпорни на скокот на каматните стапки, на актуелните ограничувања поради Ковид вирусот во Кина и на енергетската криза во Европа.
Регионална слабост
Додека Мерцдес ги подигна своите проекции, рекордната инфлација и растечките каматни стапки го погодуваат работењето на компанијата во САД и Европа, за каде што менаџментот ги намали очекувањата за продажба. Производителот на автомобили сега ги гледа испораките за САД значајно пониски отколку во претходната година, кога прогнозите за продажбата на тој пазар беа дека ќе има благо намалување. Во Европа продажбата дополнително ќе падне од и без тоа ниското ниво, што е намалување во однос на претходната прогноза за стабилност на пазарот.
Се очекува дека слабеењето на пазарите во САД и Европа ќе бидат надоместени со значајно зголемената продажба во Кина, каде даночните олеснувања за купување автомобили би требало да ја поттикнат побарувачката по низата строги мерки и ограничувања поради пандемијата.
Општо, Мерцедес се држи на проекциите за благ пораст во светската испорака за оваа година. Претходно во текот на овој месец производителот на луксузни возила вети дека ќе оствари солиден поврат следната година, дури и додека се очекува дека глобалните прогнози ќе се влошат. Дел од планот на компанија е префрлање на портфолиото на модели на повеќе пазари каде што купувачите се помалку погодени од економските циклуси. До 2025 година Мерцедес цели на оперативна маржа од 14 проценти во поволно опкружување, односно на не помалку од 8 отсто во лоши услови.
.webp){kind=icon}
