Новиот шеф на FTX го откри хаосот што зад себе го оставил Банкмен-Фрид

Советниците кои го надгледуваат колапсот на крипто-берзата ФТХ (FTX Group) на Сем Банкмен-Фрид објавија неверојатен список на обвинувања против поранешното раководство на компанијата, осудувајќи го непостоечкиот надзор и злоупотребата на средствата на клиентите, додека се борат да лоцираат милијарди долари од исчезнатите средства.

„Никогаш во мојата кариера не сум видел таков тотален неуспех од корпоративна контрола и такво комплетно отсуство на веродостојни финансиски информации“, посочи во изјавата поднесена до стечајниот суд Џон Џеј Реј Трети, новиот извршен директор на групацијата, кој претходно ја надгледуваше ликвидацијата на „Енрон“ (Enron). 

„Од компромитиран интегритет на системот и погрешен регулаторен надзор во странство, до концентрација на контролата во рацете на многу мала група на неискусни, несофистицирани и потенцијално компромитирани поединци, оваа ситуација е без преседан“, додава тој.

Документите го опишуваат ризичното крипто-претпријатие како лишено од речиси какви било политики и практики што би биле норма за секоја друга корпорација. Покрај тоа, тие веројатно ќе помогнат да се покрене кривична истрага и регулаторна акција против Банкмен-Фрид, а FTX веќе се соочува со истрага од американските обвинители.

Банкмен-Фрид не одговорил на барањето за коментар во однос на ваквите обвинувања.

Новите стечајни документи вклучуваат наводи за:

• Софтвер кој се користел за прикривање на злоупотреба на средствата на клиентите;

• Корпоративни средства на групацијата FTX биле искористени за купување куќи и други лични предмети за вработените;

• Една необезбедена групна е-пошта која се користила за пристап до приватни клучеви и чувствителни податоци ширум светот;

• Банкмен-Фрид често комуницирал преку апликации кои автоматски ги бришеле содржините во краток рок и барал од вработените да го прават истото;

• „Алмеда“ (Alameda Research), трговската фирма на Банкмен-Фрид, била тајно изземена од некои аспекти на трговската политика на FTX.com.

Лошото водење на евиденцијата и недостатокот од организација и систематизација ќе донесат дополнителни предизвици за многу советници на FTX кои работат деноноќно за да повратат милијарди долари што им се должат на клиентите.

Реј воопшто не покажува воздржаност во својата изјава, нарекувајќи ги неодамнешните јавни пораки на Банкмен-Фрид „погрешни“. Во обидите да го дефинираат обемот на готовина на FTX, советниците им порачаа на финансиските институции да ги замрзнат плаќањата и да ги одбиваат сите инструкции од Банкмен-Фрид.

Мрежата на делување на Банкмен-Фрид / Bloomberg

Советниците лоцираа само дел од дигиталните средства за кои се надеваат дека ќе бидат повратени за време на банкротот во рамки на Поглавјето 11, рече Реј. Досега, тие имаат обезбедено криптовалути во вредност од околу 740 милиони долари во офлајн ладни паричници (метод на складирање дизајниран за да спречи хакери).

Не треба да им се верува на ревидираните финансиски извештаи на компанијата - од кои некои биле изработени од фирма која се рекламира како првиот CPA (certified public accountant - овластен јавен ревизор) што отворил канцеларија во метаверзумот, рече Реј. Советниците работат на повторно креирање биланси за ентитетите на FTX од дното нагоре, додаде тој.

FTX „не одржувал централизирана контрола врз готовината“ и не водел точна листа на банкарски сметки и потписници на сметките, ниту пак посветил доволно внимание на кредитната способност на банкарските партнери, вели Реј. Советниците сè уште не знаат колку готовина имала компанијата кога поднела барање за банкрот, но досега откриле околу 560 милиони долари кои се припишуваат на различни ентитети на FTX.

Реј посочува дека водењето на евиденцијата на компанијата било толку лабаво што адвокатот не можел да подготви целосен список на оние кои работеле за FTX Group од датумот на барањето за банкрот, ниту пак условите за нивно вработување.

Bloomberg

Некои од недвижностите купени со пари од корпоративните фондови на FTX биле регистрирани на лични имиња на вработени и советници на FTX, напиша тој, а контролите за исплати на компанијата биле несоодветни.

„На пример, вработени во FTX Group поднеле барања за плаќање преку онлајн платформа за 'чет' каде засебна група супервизори одобрувале исплати со соодветни персонализирани емотикони“, се наведува во соопштението.

Фуснота во документите укажува дека Alameda Research Ltd. од 30 септември, позајмила милијарда долари на Банкмен-Фрид и повеќе од 500 милиони долари на ко-основачот на FTX, Нишад Синг. Финансиските извештаи со детали за трансакциите не биле ревидирани, а бидејќи биле направени додека Банкмен-Фрид го контролирал бизнисот, Реј посочува дека нема доверба во нивната точност.

FTX сега се бори со Банкмен-Фрид за тоа дали неговата империја треба да биде под јурисдикција на американските судови, каде што повеќе од 100 поврзани компании се во банкрот - или на Бахамите, локација која според поранешниот извршен директор е посоодветна. Правниот тим на FTX колапсот делумно го препиша на слабиот надзор од регулаторите кои не се од САД.

Во моментов нема коментари за веста. Биди прв да коментира...

Остави коментар