.webp){kind=icon}
Компанијата Мета „заработи“ нова казна од 275 милиони долари поради кршење на европските правила за приватност бидејќи со протекување на податоци од социјалната мрежа Фејсбук биле објавени лични податоци на повеќе од 500 милиони корисници
Казната на компанијата на Марк Закерберг ја изрече ирската Комисија за заштита на податоци и ова не е прв пат. Мета во септември годинава беше казнета со 400 милиони долари поради повреда на заштитата на податоците при третман на деца. Во октомври минатата година, ирските власти ја казнија компанијата со околу 225 милиони евра за прекршоци поврзани со пораките на WhatsApp. Со најновата глоба, износот на казните за кршење на европските прописи за приватност се искачи на повеќе од 900 милиони долари.
Казните се последица на построгата регулатива во Европската унија по усвојувањето на Општата регулатива за заштита на податоците. Со задача да го надгледува усогласувањето на технолошките компании со правилата за заштита на податоците од 2018 година, Ирска се најде под зголемен притисок. На државата и е доделена клучна улога во спроведувањето на европските регулативи за заштита на податоците, бидејќи бројни технолошки компании како Мета, Гугл и Твитер имаат свои европски седишта токму таму. Се истражува и TikTok, кој исто така го отвори своето седиште во Ирска.
Во текот на минатиот месец Мета, чии акции беа на рекордно ниско ниво во последните десет дена, отпушти околу 13 отсто од својата работна сила или околу 11 илјади вработени.
Последната казна за Мета е резултат на прекршување на правата за заштита на податоците што се случи поради тоа што податоци кои беа украдени од Фејсбук беа пронајдени на форумите на интернет. Беа објавени имињата на корисниците, локациите и датумите на раѓање.
По изрекувањето на казната, Мета се обрати до јавноста со соопштение во кое истакна дека кражбата и проневера на податоци се неприфатливи и дека се против нивните правила. Напоменаа дека за да не се повтори ваквото сценарио, ја промениле политиката за заштита на податоците. Сепак, не кажаа дали ќе се жалат на таа одлука.
Мета не е единствениот технолошки гигант под строга контрола од регулаторите. Минатата година, европските регулаторни власти го казнија Амазон со речиси 750 милиони евра за онлајн рекламирање. Во јануари, француските регулатори го казнија Google (Гугл) со 90 милиони евра за прекршоци поврзани со собирање податоци од корисниците на YouTube (Јутјуб).
