Илон Маск, кој се наоѓа под вкрстен оган поради неодамнешните промени во политиката на „Твитер“ (Twitter Inc.), ги прашува корисниците дали треба да се повлече од функцијата шеф на компанијата.
Во моментот остануваат уште три часа од гласањето и од дадени 14 милиони гласа, 57 отсто од корисниците велат „да“. Милијардерот сопственик на „Твитер“ и главен извршен директор на „Тесла“ (Tesla Inc.) вети дека ќе се придржува до резултатите од анкетата. Три од главните теми на „Твитер“ во САД во текот на ноќта беа за самата платформа, вклучувајќи и „VOTE YES“ и „CEO of Twitter“.
Маск беше во Катар за да го гледа финалниот натпревар на Светското првенство меѓу Аргентина и Франција и по завршувањето на натпреварот ја објави својата анкета на Твитер. Тој, исто така, вети дека ќе спроведува гласања за какви било големи промени на политиката во иднина, извинувајќи се што не го сторил тоа претходно.
По преземањето на „Твитер“, Маск ги издржа критиките за неговите големи промени во социјалната мрежа, како што беа отпуштањето на повеќе од половина од персоналот и враќањето на претходно забранетите налози, како и повиците за повторно фокусирање кон „Тесла“, чии акции губат на вредност. Откако без голем ентузијазам го заврши купувањето на „Твитер“ кон крајот на октомври, тој посвети голем дел од своето време на социјалната мрежа.
Прочитајте повеќе: Маск го навлече гневот на Европа откако од Твитер отстрани новинари
Објавуваше и доцна во четвртокот, откако се вплетка во проблеми со новинарите, едни од најангажираните и најактивни корисници на Твитер. Компанијата забрани повеќе професионалци од големи медиуми, како „Вашингтон пост“ и Си-ен-ен, врз основа на тврдење дека ја откриваат локацијата на Маск. Овој потег наиде на осуда од страна на Американската унија за граѓански слободи, па дури и од Обединетите нации, кои го нарекоа „опасен преседан“.
Во текот на викендот, „Твитер“, исто така, објави па повлече промена на политиката со која ќе ги забрани сметките „создадени исклучиво“ за промовирање конкурентски социјални мрежи. Таа одлука доведе до суспензија на најмалку еден истакнат налог, што го натера Маск да се изјасни дека ќе ја приспособи политиката само неколку часа по нејзиното воведување. Подоцна на налогот на „Твитер сејфти“ (Twitter Safety) излезе анкета за тоа дали треба да има политика за отстранување сметки што промовираат други социјални мрежи.
.webp){kind=icon}
