Абрамович вложил милиони во најголемата американска компанија за канабис

Најголемата американска компанија за канабис во првите години од работењето добила финансии од стотици милиони долари од Роман Абрамович, но рускиот милијардер одамна ја напушти компанијата, коментира претседателот на Управниот одбор на „Кјуралиф холдингс“ (Curaleaf Holdings), Борис Џордан, за известувањата во медиумите.

„Форензик њуз“ (Forensic News) во петокот објави дека протечени документи покажуваат оти Абрамович ја финансирал „Палијатек“ (Palliatech), компанија која стана „Кјуралиф“ во 2018 година, како и „Межр 8“ (Measure 8), фирма за ризичен капитал основана од Џордан која инвестирала во канабис. Иако руското потекло на клучните директори на „Кјуралиф“ беше јавно познато, вмешаноста на Абрамович не беше. Компаниите поврзани со Русија се под лупа на јавноста од инвазијата на Украина, поради што некои руски олигарси и компании се санкционирани.

Абрамович беше јавно познат во западните деловни кругови и сопственик на фудбалскиот клуб Челзи, луксузни недвижности и удел во групацијата за челик „Евраз“ (Evraz) со седиште во Лондон. Уште тогаш, неговиот однос со рускиот претседател Владимир Путин беше контроверзен. Сите овие средства беа продадени или замрзнати по инвазијата на Украина, како што се случи и со сите други членови на руската деловна елита. Абрамович е санкциониран во Велика Британија, ЕУ и Канада, но не и во САД.

Џордан, американски државјанин кој некогаш ја водеше канцеларијата на „Кредит суис“ (Credit Suisse Group AG) во Москва и помогнал во приватизацијата на руските државни средства по падот на комунизмот, вели дека американските граѓани како него не треба да бидат дискриминирани поради врските со Русија. Во интервјуто во петокот, тој рече дека откритијата за поранешните инвестиции на Абрамович не треба да влијаат на „Кјуралиф“, со седиште во Вејкфилд, Масачусетс.

„Тој ни позајми пари за инвестирање мене и на Андреј. Сите тие средства беа вратени многу одамна, пред војната, на крајот на 2020 или 2021 година“, рече Џордан, мислејќи на Андреј Блох, главен акционер на „Кјуралиф“. „Колку што знаеме, Роман Абрамович повеќе не е меѓу акционерите на 'Кјуралиф'“.

Џордан рече дека „Палијатек“ бил финансиран од 2015 до 2017 година откако се поврзал со семејната канцеларија на Абрамович преку Блох, кој има американско и руско државјанство. Бидејќи ниту Блох, ниту Абрамович не се санкционирани во САД, Џордан вели дека не гледа причина за загриженост за нивните врски.

Канада претходно неделава соопшти дека има намера да заплени 26 милиони долари во санкционирани средства од Абрамович за да ги искористи за да помогне во обновата на Украина и за отштета на воените жртви. Обединетото Кралство објави замрзнување на имот од седум милијарди долари поврзан со олигархот, кој годинава го продаде својот фудбалски клуб Челзи.

Адвокатската фирма која Абрамович ја ангажира оваа година не одговорила веднаш на барањето за коментар. „Милхаус капитал“ (Millhouse Capital), инвестициската фирма на Абрамович, исто така не одговорила на барањето за коментар.

Според „Форензик њуз“, инвестициите на Абрамович во „Кјуралиф“ и нејзините филијали изнесуваат околу 225 милиони долари. Џордан рече дека тој и Блох добиле инвестиции од неколку други семејни канцеларии, кои сè уште не се обелоденети, а вкупното почетно финансирање е околу половина милијарда долари.

„Пред војната тој беше еден од најбараните инвеститори во светот“, рече Џордан, мислејќи на Абрамович. „Да се ​​има како инвеститор се гледаше како голема предност“.

Акциите на „Кјуралиф“, која продава марихуана во повеќе од десет американски држави, пораснаа за 5,3 отсто во канадското тргување во петокот. Акциите изгубија околу половина од својата вредност годинава поради доцнењето во носењето на американската легислатива за субвенции на индустријата. Џордан имал 72 отсто од гласачките права на „Кјуралиф“на крајот на јули, а Блох имал 6 отсто, според документите на компанијата.

Абрамович инвестирал и во првиот фонд „Межр 8“, со седиште во Њујорк, основан од Џордан. Инвестицијата на Абрамович била помала од 30 отсто од вкупниот износ, а иако сè уште не е целосно исплатена, тој нема право на глас, ниту место во одборот, вели Џордан. Податоците на „Блумберг“ покажуваат дека фондот собрал околу 75 милиони долари.

„Тој е само инвеститор во фонд. Исто како и секој друг“, кажа Џордан кој исто така е претседател на СПГ (SPG), семејната канцеларија со седиште на Бахамите, порано позната како „Спутник груп“ (Sputnik Group). 

На почетокот на годинава тој поднесе оставка од управниот одбор на една од најголемите осигурителни компании во Русија - „Ренесанс“ (Renaissance Insurance Group). 

Џордан рече и дека неговите врски со Путин, кој често се споменува во вестите за „Кјуралиф“, се претерано нагласени. Тој посочи дека се среќавал со рускиот лидер на меѓународни настани, но немал лични контакти со него. „Не сум го видел и не сум разговарал со Путин од 2003 година“, истакна тој.