.webp){kind=icon}
Илјадници вработени во Велика Британија ќе започнат со шестмесечен пробен период на скратена работна недела, сè попопуларен начин на работа во светот. Повеќе од 3.300 работници од 70 компании учествуваат во експериментот - кој се смета за најголем од ваков вид во светот досега.
Според британските медиуми, опсегот на учесници е доста широк, па има програмери, локални трговци, добротворни организации...
Од денеска сите наместо пет ќе работат четири дена во неделата - со иста плата. Таканаречениот модел 100:80:100 значи 100 отсто од заработката за 80 отсто посветено време, во замена за одржување на 100 отсто од продуктивноста.
Целта на истражувачите е да ја измерат продуктивноста на бизнисот и благосостојбата на работниците, како и влијанието врз животната средина и родовата еднаквост. Ќе се анализира како дополнителното слободно време влијае на нивото на стрес и замор, но и други аспекти како што се здравјето, задоволството од работата и животот воопшто, користењето на енергија и сл.
Искуствата на вработените и нивните претпоставени во компаниите кои веќе го прифатиле овој модел на работа изгледаат оптимистички и многумина укажуваат на придобивките од новата практика. Меѓу нив се поголема мотивација, подобар фокус, повеќе време со семејството, па дури и поквалитетен сон. Едно од мислењата е дека нема причина работниците да се држат до застарени практики и бесмислено да го пополнуваат работното време со сурфање на интернет, кога сите задолженија можат да се извршат многу поефикасно. Зошто разговорите, состаноците и интервјуата да бидат неоправдано долги, речиси по правило?
Всушност, не се работи за извршување на самата работа со побрзо темпо од претходно, туку за ослободување на вработените од непродуктивните практики. Многубројните примери на компании во светот веќе го докажуваат успехот на работата со скратено работно време.
Сепак, ограничено. Оние кои се залагаат за новиот систем на работа самите признаваат дека четиридневниот модел не би бил применлив во сите сектори. На пример, според локалните медиуми, здравството и образованието се сметаат за тешко приспособливи во тој поглед.
Пробниот период на новиот начин на работа во Велика Британија го организира група која се бори за пократка работна недела без губење на заработката наречена „4 деј вик глобал“ (4 Day Week Global) во соработка со тинк-тенкот „Аутономи“ (Autonomy). Истражувачи од Кембриџ, Оксфорд и Универзитетот во Бостон се ангажирани во управувањето со експериментот.
Сето ова, како што се наведува, е дел од една поширока глобална иницијатива и се одвива паралелно со слични, помали тестови во Ирска, САД, Канада, Австралија и Нов Зеланд.
