„Ербас“ (Airbus SЕ) и „Боинг“ (Boeing Co) минатата година остварија најголеми продажби на авиони од пандемијата, но недостигот од доставувачи и работна сила сè уште ги попречува напорите за зголемување на производството.
Дуополот на производители на авиони минатата година добил резервации за 1.628 нови нарачки, што е најдобар резултат од 2018 година. „Боинг“ особено добро заврши во декември, сигнализирајќи дека неговото закрепнување зема замав. Компанијата ги забележа своите највисоки месечни испораки во последните четири години и најголема бруто-нарачка во последните пет години.
Неодамнешниот пресврт во деловните резултати на „Боинг“ ги поттикна акциите на компанијата, кои пораснаа за повеќе од 70 отсто од крајот на септември и го предводат растот на индексот Dow Jones Industrial Average. Акциите на конкурентниот „Ербас“ пораснаа за околу 30 отсто во истиот период, иако продаде, произведе и испорача повеќе авиони од „Боинг“ во 2022 година.
И покрај силниот декември, билансот на „Боинг“ од 480 испораки во текот на целата година беше помал од тој на неговиот европски колега, резултат што на „Ербас“ му даде право да се фали дека е најголем светски производител на авиони веќе четврта година по ред. „Ербас“, чие седиште е во Тулуз, Франција, обезбеди нето-нарачки за 820 авиони, наспроти 808 за „Боинг“. Компанијата испорача 661 авион, што е далеку под нејзината претходна цел од 700.
„Ние сме ограничени со резервите и понудата. Спротивните ветрови кога станува збор за синџирот на снабдување остануваат и во 2023 година. И ќе биде предизвик да се засили работата во една ваква средина“, рече главниот извршен директор на „Ербас“, Џулијан Фори.
Прекинот на синџирот на снабдување го натера „Ербас“ да се откаже од целта во почетокот на минатиот месец. Производителот на авиони претходно, во јули, ја намали првичната цел од 720 испораки за 2022 година. „Боинг“ денеска соопшти дека во декември предал 69 авиони и забележал 250 нарачки.
И двата производитела се мачеа да ги исполнат обврските за продажба, бидејќи пандемијата попушти, оставајќи ги со недостиг од компоненти и квалификувани работници.
„Боинг“ за својата заработка во четвртиот квартал треба да извести на 25 јануари, додека „Ербас“ треба да го објави извештајот на 16 февруари.
„Како што заздравува авиоиндустријата, така гледаме силна побарувачка за нашите производи. Ќе останеме фокусирани на стабилноста во работата и синџирот на снабдување додека работиме на испораките за нашите клиенти во 2023 година и подоцна“, рече Стен Дил, раководител за комерцијални авиони на „Боинг“.
.webp){kind=icon}
