„ТАВ Македонија“, аеродромскиот оператор на двата македонски аеродрома, Меѓународниот Аеродром Скопје и Аеродромот Св. Апостол Павле Охрид бележи 70 проценти пораст во патничкиот сообраќај во 2022, споредено со 2021 година, додека споредено со референтната година во воздухопловството, 2019 година, патничкиот сообраќај е на -11 проценти, односно 89 отсто стапка на закрепнување согласно статистиката на патничкиот авиосообраќај за 2019 година.
Двата македонски аеродрома, како што информираат од „ТАВ“, ја завршија 2022 година со значително закрепнување на патничкиот авиосообраќај со што достигнаа приближно 2,4 милиони патници или вкупно опслужени 2.371.423 патници и 19.448 летови.
Од „ТАВ“ посочуваат дека по две исклучително тешки години за воздухопловната индустрија ширум светот и по почетокот на периодот на опоравување по пандемијата, кој особено започна во средината на 2022 година со летната сезона, силното зголемување на обемот на патничкиот воздушен сообраќај значи дека луѓето се уверени и подготвени да патуваат со авион и дека воздушниот сообраќај е на пат да го достигне нивото пред кризата.
„Според бројките и статистиките, резултатите и динамиката на закрепнување на аеродромите управувани од „ТАВ Македонија“ ги следат европските и светските стапки на закрепнување. Особено сме горди и среќни што закрепнувањето на македонскиот пазар на авиосообраќај оди дури и подалеку од прогнозата на Меѓународниот совет на аеродроми – ACI за глобалното движење на авиосообраќајот, чие оптимистичко сценарио предвидуваше дека глобалниот воздушен сообраќај во 2022 година ќе биде на ниво од -23 отсто, а скопскиот и охридскиот аеродром ја завршија 2022 година со -11 проценти, или со 89 отсто од обемот на патници во 2019 година. Оттука, може да се заклучи дека ТАВ Македонија како аеродромски оператор ефикасно и успешно ја совладува и надминува кризата и нејзините последици, додека силен раст на патничкиот авиосообраќај и бројот на летовите би биле карактеристиките на изминатата 2022 година“, изјави генералниот директор на „ТАВ Македонија“, Метин Батак.
Претставниците на аеродромскиот оператор веруваат дека овој позитивен тренд во закрепнувањето на патничкиот авиосообраќај ќе продолжи и во текот на 2023 година и дека прогнозите на ACI за европскиот аеродромски патнички сообраќај од -9 отсто за 2023 година, во споредба со 2019 година, повторно ќе бидат надминати.
„Сигурни сме дека нивото на вложениот труд во секојдневното аеродромско работење и квалитетот на аеродромските услуги за нашите клиенти обезбедени од нашиот искусен, стручен и посветен персонал, како и одличната соработка со сите засегнати страни и властите во воздухопловството дополнително би биле причина аеродромите во Скопје и Охрид да го постигнат барем нивото на воздушниот сообраќај за 2019 година и да слават нови успеси и одлични резултати“, рече Батак.
Најфреквентни дестинации од Меѓународниот Аеродром Скопје според статистиката за патничкиот авиосообраќај на „ТАВ Македонија“ за 2022 година се Истанбул (двата аеродроми ИГА и Сабиха Гокчен со 13,1 проценти пазарен удел), Базел Милуз (6,3 проценти), Виена (6,2 проценти), Цирих (6,2 проценти), Анталија (4,2 проценти), Дортмунд (4 проценти), Минхен Меминген (4 проценти) и Келн (3,1 процент).
Топ пет земји со директни летови за 2022 година се Германија (24 проценти пазарен удел), Турција (19,1 процент), Швајцарија (14,2 проценти), Шведска (6,9 проценти) и Австрија (6,2 проценти).
Во однос на учеството на авиокомпаниите во патничкиот сообраќај во 2022 година на скопскиот аеродром, „Виз ер“ (Wizz Air) има превезено најголем број патници во 2022 година (59,3 проценти пазарен удел), потоа следат „Туркиш ерлајнс“ (Turkish Airlines) со 11 проценти, „Пегасус Ерлајнс“ (Pegasus Airlines) со 6,7 проценти, „Аустриан Ерлајнс“ (Austrian Airlines) со 6,2 проценти и „Чеир Ерлајнс“ (Chair Airlines) со 4,9 проценти.
На охридскиот аеродром, најфреквентна дестинација за патување за 2022 година е Виена (18 проценти пазарен удел), потоа Базел (15,9 проценти), Цирих (11,9 проценти), Меминген (11 проценти), Малме (10,8 проценти), Фридрихсхафен (8,7 проценти), Дортмунд (8,6 проценти), Амстердам (8,3 проценти), додека останатите дестинации се со пазарен удел од 1,2 проценти.
„Моментално и според зимскиот ред на летање, од Меѓународниот Аеродром Скопје, 11 авиокомпании (Air Serbia, Austrian Airlines, Croatia Airlines, Edelweiss, Chair Airlines, Pegasus Airlines, Turkish Airlines, LOT, Aegean, Wizz Air, Easyjet) сообраќаат до 36 дестинации, додека од Аеродромот Св. Апостол Павле Охрид, 2 авиокомпании (Wizz Air, Chair Airlines) сообраќаат до четири дестинации“, информираат од ТАВ Македонија.
.webp){kind=icon}
