.webp){kind=icon}
„Луј Витон“ (Louis Vuitton) го именува музичкиот продуцент Фарел Вилијамс за нов дизајнер на машка облека, пополнувајќи ја улогата што претходно ја имаше покојниот Вирџил Аблох. Назначувањето стапува во сила веднаш, а Вилијамс ќе ја претстави својата деби-колекција на модната недела за машка облека во Париз во јуни, се вели во денешното соопштение на францускиот бренд.
Аблох беше ѕвезда за дизајн на машка облека во „Луј Витон“ пред неговата смрт од рак во 2021 година, на 41-годишна возраст.
„Креативната визија на Вилијамс, надвор од модата, несомнено ќе го води 'Луј Витон' кон ново и многу возбудливо поглавје“, рече во изјавата Пјетро Бекари, главен извршен директор на брендот.
Вилијамс првпат се прослави во доцните 1990-ти како дел од продукциското хипхоп-дуо „Нептунс“ (The Neptunes). Оттогаш тој ја зацврсти својата позиција како познато име со низа победи на наградите „греми“, хит-синглови и номинации за „оскар“. Како и Аблох, кој е запаметен по своето влијание врз уличната облека и културата на патики со својот бренд „Оф вајт“ (Off-White), Вилијамс е исто така претприемач во областа за облека.
Во 2003 година тој и јапонскиот дизајнер Ниго го основаа „Билионер бојс клаб“ (Billionaire Boys Club), бренд за облека, додатоци и животен стил. Ниго сега е уметнички директор на „Кензо“ (Kenzo) на LVMH. Оттогаш Вилијамс соработуваше со други брендови, вклучувајќи го и германскиот производител на патики „Адидас“ (Adidas AG), и го основа брендот за нега на кожа „Хјуманрејс“ (Humanrace).
Луј Витон е моќник што помага во придвижување на пошироката луксузна империја LVMH, основана од најбогатиот човек на светот, Бернард Арнолт. Продажбата на етикетата минатата година надмина 20 милијарди евра (21,4 милијарди долари) и иако LVMH не го разложува профитот по брендови, аналитичарите во HSBC процениле дека „Луј Витон“ генерира околу половина од годишниот профит на групацијата.
„’Луј Витон’ е многу повеќе од само модна компанија. Всушност, тоа не е модна компанија, тоа е културна креативна компанија, која допира до многу важна база на клиенти“, им рече Арнолт на аналитичарите и новинарите пред една година.
Ревиите на машка облека на „Луј Витон“ станаа главни настани за време на модната недела во Париз. Во изминатата година музичари како Тајлер Креатор, Јасин Беј (порано познат како Мос Деф), Кендрик Ламар и минатиот месец шпанската ѕвезда Росалија настапија за гостите што присуствуваа на ревиите, давајќи му на брендот неспоредлива видливост во објавите на Инстаграм.
И самиот Вилијамс е близок до LVMH. Во изминатата година тој присуствуваше на ревиите на „Кензо“ во Париз и носеше дијамантски очила за сонце од „Тифани“ (Tiffany & Co), двете етикети на LVMH. Уметникот исто така соработуваше со „Луј Витон“ во 2004 и 2008 година.
Оваа објава доаѓа откако Бекари неодамна ја презеде функцијата извршен директор на најголемиот бренд на LVMH, откако го водеше „Кристијан Диор“ (Christian Dior Couture), вториот по големина бренд на групата, кој сега го предводи Делфин Арнолт, најстарото дете на Бернард Арнолт.
Дизајнот на женска облека на „Луј Витон“ е предводен од уметничкиот директор Николас Гескиер. Веста за приклучувањето на Вилијамс во „Луј Витон“ први ја објавија „Волстрит џурнал“ (Wall Street Journal) и „Ле фигаро“ (Le Figaro).
