Првото модно шоу на музичарот Фарел Вилијамс како дизајнер на машка облека на гигантот „Луј Витон“ беше спектакл со големи ѕвезди во Париз, со настап на Џеј Зи, најпознатите од светскиот шоу-бизнис, госпел-хор и модели во маскирни јакни и чизми, сето тоа под погледот на шефот и милијардер Бернард Арно.
На своето деби-шоу за најголемиот бренд од конгломератот ЛВМХ (LVMH - Moët Hennessy Louis Vuitton), музичката ѕвезда што стана дизајнер покани близу 1.800 гости. Тие се собраа на најстариот мост во Париз - што се наоѓа во близината на седиштето на „Луј Витон“ - за да ја видат неговата визија за тоа што треба да носат мажите во пролет и лето следната година.
Визија: Спиди-чанти украсени со монограми во светлоцрвена и жолта боја, бермуди во комбинација со бели чорапи и мокасини, маслинесто-зелена авијатичарска јакна, беретки и многу „дамофлаж“ (Damoflage), или зборот што Вилијамс го користи за дезените со пикселизирана камуфлажа. Моделите одеа по пистата поставена на мостот „Пон Ноф“ додека во заднината одеше саундтракот компониран од Вилијамс, кој има освоено низа награди „греми“. Пијанистот Ланг Ланг предводеше оркестар, а настапот на госпел-хорот ја раздвижи публиката во топлата вечер.
Колекцијата на машка облека за пролет-лето 2024 година на „Луј Витон“
Bloomberg
Арно, извршниот директор на матичната компанија на „Луј Витон“, ЛВМХ, и еден од најбогатите луѓе во светот, снимаше делови од настанот со својот телефон. Тој за „Блумберг“ по шоуто изјави дека е воодушевен од она што го видел. На милијардерот основач на ЛВМХ му се придружи неговата сопруга Хелен Мерсие, облечена во светлоцрвена јакна и панталони, како и неговите пет деца, кои работат во луксузната групација.
Првото шоу на Вилијамс за „Луј Витон“ беше „секако еден од најочекуваните моменти во сезоната“, посочи Алисон Бринге, главна маркетинг-директорка во дигиталната консултантска куќа „Лаунчметрикс“ (Launchmetrics). Поп-ѕвездата Бијонсе, инфлуенсерката Ким Кардашијан, пејачката Ријана со часовник од 670.000 долари, шампионот во Формула 1, Луис Хамилтон, и дизајнерот на женска облека од „Луј Витон“, Николас Геские, седнаа во првите редови. Градоначалничката на Париз, Ан Идалго, и Адам Мосери, шефот на „Инстаграм“, исто така се најдоа на листата на гости.
Фарел Вилијамс настапува со Џеј Зи по промоцијата на колекцијата
Bloomberg
Вилијамс беше назначен за дизајнер на машка облека на најголемиот бренд на ЛВМХ во февруари, пополнувајќи го вакуумот откако претходниот дизајнер Вирџил Абло почина од рак кон крајот на 2021 година, на 41-годишна возраст.
„Кога универзумот ќе ве тапне по рамо, вие слушате и го фаќате бранот“, им рече Вилијамс на новинарите во Париз во вторникот, пред настанот. „Ова е неверојатно, јас сум вториот црнец што некогаш го доживеал ова на планетата, во најголемата модна куќа во светот“.
Назначувањето на Вилијамс изненади некои лица од светот на модата, кои ја доведоа во прашање неговата компетентност. „Некои луѓе се прашуваа: 'Зошто тој? Тој не е формално образован дизајнер, не студирал тука, не студирал таму'. Па не, навистина не сум, но исто така не отидов на Џулијард за да учам музика, па се снајдов ок“, рече тој мислејќи на училиштето за изведувачки уметности во Њујорк.
Модел вози возило што носи куфери од колекцијата на „Луј Витон“
Bloomberg
Со изборот на Вилијамс, „Луј Витон“ се одлучи за „креативец во поширока смисла“, наместо „потрадиционален“ дизајнер, изјави извршниот директор на „Луј Витон“, Пјетро Бекари, за новинарите пред ревијата.
Иако машката облека веројатно придонела со само 5 отсто во вкупната продажба на „Луј Витон“, номинацијата на Вилијамс има „поголем ефект“ за остатокот од брендот, се наведува во белешката на ХСБЦ (HSBC) од 28 март. Иако ЛВМХ не ги разложува финансиските перформанси по брендови, „Луј Витон“ е ударната игла што помага да се придвижува поширокиот луксузен конгломерат, најверојатно генерирајќи повеќе од половина од годишниот профит на групацијата, велат од банката.
Извршниот директор на ЛВМХ, Бернард Арно, стои меѓу ВИП-гостите
Bloomberg
Вилијамс (50) долго време е моден претприемач. Во 2003 година, Вилијамс и јапонскиот дизајнер Ниго го основаа „Билионер бојс клаб“ (Billionaire Boys Club), бренд за облека, додатоци и начин на живот. Ниго сега е уметнички директор на „Кензо“ (Kenzo), што исто така е дел од ЛВМХ. Вилијамс има соработувано и со брендови како „Адидас“ и „Шанел“. Во 2004 година, тој лансира очила за сонце наречени „милионер“ (Millionaire), работејќи со тогашниот дизајнер на „Луј Витон“, Марк Џејкобс, а четири години подоцна работеше на колекција на накит за брендот.
Од лево кон десно: Тајлер Креаторот, Жан Арно, Зита д'Хотвил, Фредерик Арно и Наталија Водијанова
Bloomberg
Најголемиот светски луксузен моден бренд, кој генерираше повеќе од 20 милијарди евра во продажба минатата година, претрпува големи промени во 2023 година. Во јануари, ЛВМХ го назначи Бекари за нов извршен директор на „Луј Витон“, наследувајќи го Мајкл Бурк, кој беше на чело една деценија.
Дизајнерот на женска облека на „Луј Витон“, Николас Геские, седи покрај извршниот директор на брендот, Пјетро Бекари, на ревијата
Bloomberg
Запрашан за соработката со дизајнерите за да се постави насока за брендот, Бекари призна дека постигнувањето рамнотежа помеѓу визијата на дизајнерот и погледот на извршниот директор понекогаш може да претставува предизвик. „Секој ќе мора да направи компромис“, рече Бекари. „И јас имам дебела кожа“, се пошегува тој.
.webp){kind=icon}
