Најбогатиот човек во Шпанија и основач на модниот бренд „Зара“ (Zara), Амансио Ортега, минатата година го прошири своето портфолио на комерцијални недвижности. Тој стекнал најмалку 10 имоти низ Северна Америка и Велика Британија за повеќе од две милијарди долари.
Според извештајот за богатство за 2023 година изработен од „Најт Френк“ (Knight Frank), и други ултрабогати поединци и нивните инвестициски фирми останале фокусирани на класата на средства што е меѓу најтешко погодените од пандемијата и има трајни ефекти од работењето од далечина.
Тоа е остар контраст со институционалните инвеститори, кои го намалија својот удел на пазарот од 1,1 билион долари за канцеларии, логистички локации и станови за изнајмување, бидејќи неисполнетите обврски почнаа да растат поради повисоките каматни стапки на крајот на ерата на лесна заработка.
Богатите поединци и компаниите во семејна сопственост ги искористиле помалата задолженост и подолгиот инвестициски хоризонт за да потрошат вкупно 455 милијарди долари на комерцијални недвижности минатата година. По првпат тие беа најактивните купувачи на годишно ниво, објави во средата лондонската брокерска куќа „Најт Френк“.
Во извештајот понатаму се наведува дека вкупните инвестиции на светските богаташи забележале пад од осум проценти во однос на претходната година, кога по воздржаноста од инвестиции проследена со карантин поради пандемијата, сепак, е забележан рекорден скок на инвестициите во недвижности. Наспроти ова, инвестицискиот обем на институционалните компании за истиот период забележал пад од 28 отсто.
Приватните инвеститори ги зголемија своите инвестиции во комерцијални недвижности во последните години
Bloomberg Mercury
„Приватните купувачи ги искористуваат предностите од повторното одредување на цените на имотот и посилната валутна позиција“, вели во изјава Алекс Џејмс, шеф на советодавниот сектор за приватни клиенти во „Најт Френк“, додавајќи: „Овој тренд ќе продолжи со приватните инвеститори што бараат начини да ја задржат ликвидноста на богатството“.
Бројките ја нагласуваат долгорочната инвестициска перспектива на светските ултрабогаташи и како тие често се обидуваат да го диверзифицираат своето богатство преку недвижен имот, каде што продажбата на комерцијални хипотекарни обврзници сега опаѓа, бидејќи зголемените каматни стапки го намалуваат кредитирањето.
Ортега во септември купи пет американски логистички локации за повеќе од 700 милиони долари. Во декември купи луксузна станбена висококатница во Сиетл за околу 300 милиони долари, откако ја купи и тамошната деловна зграда на „Амазон“.
Од компанијата на Ортега, „Понтегадеа“ (Pontegadea), не биле расположени за коментар. Според индексот на милијардери на „Блумберг“, нето-вредноста на Ортега се проценува на 63,5 милијарди долари, што главно доаѓа од неговиот мнозински удел во „Индитекс“ (Inditex), сопственик на модниот бренд „Зара“.
Коосновачот на „Алибаба груп“ (Alibaba Group Holding), Џо Цаи, исто така индиректно презел сопственост на неколку хотели со пет ѕвезди низ Шпанија минатата година, преку својата семејна канцеларија, „Блу пул“ (Blue Pool Capital).
„Често откривате дека во игра е своевиден лов ако купувачите се приватни инвеститори“, вели Лиам Бејли, глобален шеф за истражување во „Најт Френк“, коментирајќи ги разликите меѓу светските богаташи и институционалните компании, и додава: „За деловна зграда во Лондон, во најголем дел ќе биде игра на вложување, што може да биде мотивирано и од фактот дека на семејна компанија всушност ѝ е потребна сопствена канцеларија“.
Каде вложуваа приватните инвеститори во текот на 2022 година
Bloomberg Mercury
Приватните инвеститори најмногу се фокусирале на изнајмување станови во секторот на комерцијални недвижности во текот на 2022 година. Според извештајот на „Најт Френк“, најмногу капитал бил издвоен во САД, каде што Њујорк ја задржа својата позиција како центар за зделки со станбени недвижности во вредност од 25 милиони долари или повеќе.
Прочитајте повеќе: Монако има најскапи луксузни станови, Њујорк го надмина Лондон
Њујорк исто така ја предводеше светската ранг-листа на градови за износот потрошен на комерцијални недвижности од страна на локални приватни инвеститори во 2022 година, додека Лондон го презеде водството кога станува збор за инвестиции од странски инвеститори.
.webp){kind=icon}