Третиот помпезно најавуван мастерплан на Илон Маск за „Тесла“ (Tesla Inc.) не го привлече особено вниманието на инвеститорите, бидејќи не понуди конкретни детали за долгоочекуваната следна генерација електрични автомобили на компанијата.
Четиричасовната презентација главно се фокусираше на визијата на Маск да ја базира следната фаза од растот на „Тесла“ околу одржлива енергетска иднина со воведување производи како топлински пумпи, но недостигаа поконкретни детали за новите возила - особено за поевтино електрично возило, како моделот од 25.000 долари најавен пред повеќе од две години.
Иако 51-годишниот главен извршен директор потврди дека новата фабрика во Монтереј, Мексико, ќе ја склопува следната генерација на возила, тој не понуди детали за времето, велејќи дека „соодветен настан за промоција“ ќе се одржи подоцна. Ларс Морави, потпретседателот на „Тесла“ за инженеринг на автомобили, исто така беше непрецизен, одговарајќи на едно поставено прашање само со: „Ќе одиме најбрзо што можеме“.
Колку подолго траеше настанот, толку повеќе се чинеше дека инвеститорите го губат интересот. Акциите на „Тесла“ паднаа дури за 6,8 отсто, до 189 долари, во тргувањето по работното време. Пред овој момент, акциите се искачија од претходното ниско ниво, додавајќи околу 310 милијарди долари пазарна вредност и враќајќи го Маск на врвот на индексот на милијардери на „Блумберг“.
Маск го започна настанот со изложување на својата визија за глобална транзиција кон електрични возила, поттикната од 10 билиони долари наменети за развој на одржлива енергија во светот.
„Земјата ќе се движи кон одржлива енергетска економија“, рече тој. „И тоа ќе се случи во вашиот животен век“.
Тој исто така ја искористи можноста да го прикаже длабокиот менаџерски талент на „Тесла“ - како одговор на критиките дека го запоставил производителот на автомобили по неговото купување на „Твитер“ за 44 милијарди долари. Во еден момент на сцената му се придружија уште 16 директори, неколкумина што се главно непознати за инвеститорите. На пример Ребека Тинучи, шефицата на глобалната инфраструктура за напојување, излезе на сцената за да зборува за мрежата суперчарџер (supercharger) на компанијата и „Меџик док“ (Magic Dock) што им дозволува на возачите на други електрични возила да полнат на станиците на „Тесла“.
Depositphotos
Имаше силен акцент и на намалување на трошоците. Во сопствената желба за ефикасност, производителот планира да го намали отпечатокот на идните производствени погони за 40 отсто. Главниот финансиски директор Зак Кирхорн вети дека ќе ги намали производствените трошоци на половина за возилата од следната генерација на „Тесла“.
Еден производ кон кој може да се насочи „Тесла“ се топлинските пумпи. Маск и Дру Баглино, неговиот потпретседател за енергетско инженерство, рекоа дека топлинските пумпи може драматично да ги намалат трошоците за греење на домовите и канцелариите, нарекувајќи ги еден од најдостапните плодови од транзицијата кон одржлива енергија.
„Тесла“ повторно најави дека „сајбертрак“ (Cybertruck) доаѓа оваа година, а сериското производство се очекува во 2024 година.
Маск го објави својот прв мастерплан пред повеќе од една деценија, поставувајќи ја стратегијата на „Тесла“ да излезе на пазарот со електричен спортски автомобил, а потоа серија автомобили со попристапни цени. Компанијата ја исполни таа визија со роудстер, модел С и потоа седанот модел 3 - нејзиното најевтино возило, со почетна цена од околу 43.000 долари.
Десет години подоцна, Маск го објави вториот мастерплан (Master Plan, Part Deux), додека „Тесла“ го преземаше „Солар сити“ (SolarCity). Маск се постави како претседател на компанијата за соларни панели, која ја водеа неговите братучеди. Тој план вклучуваше соларни покриви со резерви за батерии, проширена линија на возила и технологија за самоуправување.
.webp){kind=icon}
