Британската агенција за конкуренција и пазари (CMA) го блокира преземањето на „Активижн близард“ (Activision Blizzard) од страна на „Мајкрософт“ (Microsoft) за 69 милијарди долари.
CMA објави дека спорната ситуација не може да се реши со правни лекови како што е продажбата на хит-насловот „Кол оф дјути“ (Call of Duty) или ветувањето дека на конкурентите ќе им биде дозволено да ја понудат таа игра на нивните платформи.
Аквизицијата на „Мајкрософт“ ќе беше меѓу 30-те најголеми на сите времиња, но не помина и покрај жестокото лобирање од страна на технолошкиот гигант. Дополнителен лош знак за „Мајкрософт“ е фактот што заклучоците на CMA дојдоа непосредно пред одлуката на Европската Унија и Сојузната трговска комисија на САД (ФТА), која формално стави вето на трансакцијата.
Прочитајте повеќе: Профитот и продажбата на „Мајкрософт“ ги надминаа процените
„'Мајкрософт' веќе има моќна позиција и предност во однос на другите конкуренти во индустријата за игри во облак, а овој договор дополнително ќе ја зајакне таа предност, давајќи му можност да ги поткопа новите и иновативни конкуренти“, рече Мартин Колман, претседател на независната комисија на експерти што спроведува истрагата околу преземањето.
CMA верува дека преземањето може да резултира со повисоки цени и намален избор за обожавателите на видеоигри во Велика Британија.
„Остануваме целосно посветени на оваа аквизиција и ќе се жалиме“, рече Бред Смит, претседател во „Мајкрософт“. „Одлуката на CMA го отфрла прагматичниот пат за решавање на проблемите со конкуренцијата и ги обесхрабрува технолошките иновации и инвестиции во Британија“, додаде тој.
CMA посочи дека преземањето ќе ја зајакне доминацијата на „Мајкрософт“ на пазарот така што ќе му даде контрола врз хит-игрите „Кол оф дјути“, „Овервоч“ (Overwatch) и „Ворлд оф Воркрафт“ (World of Warcraft). Тие исто така велат дека без да се приклучи на „Мајкрософт“, „Активижн“ во блиска иднина би можел да започне да нуди видеоигри на платформите за облак.
„Извештајот на CMA се спротивставува на амбициите на Британија да стане атрактивна земја за технолошките компании“, рече портпаролот на „Активижн“. „Ќе работиме агресивно со 'Мајкрософт' за да ја смениме оваа одлука“, додаде тој.
.webp){kind=icon}
