„Рајанер“ (Ryanair Holdings Plc) прогнозира дека силната побарувачка во врвот на летната сезона ќе доведе до зголемување од 10 проценти на бројот на патници и скромен раст на профитот на годишно ниво во наредната година, бидејќи патниците се враќаат на летање по пандемијата.
Нискобуџетната авиокомпанија со седиште во Даблин објави добивка по оданочување од 1,43 милијарда евра (1,5 милијарда долари) за фискалната година што заврши на 31 март, додека минатата година имаше загуба од 355 милиони евра.
„Рајанер“ очекува неговата сметка за гориво да биде повисока за една милијарда евра во тековната фискална година, велејќи дека повисоките приходи ќе го надоместат скокот.
„Ние веруваме дека ќе направиме доволно профит врз основа на тоа што го гледаме за да ја покриеме нашата зголемена сметка за гориво“, рече во интервју главниот финансиски директор Нил Сорахан.
„Рајанер“ беше меѓу најбрзите авиопревозници што закрепнаа од пандемијата. Овој месец ирскиот авиопревозник нарача дури 300 авиони „боинг 737 макс“, бидејќи цели на 30 проценти од европскиот пазар за воздушни патувања до 2034 година.
Состојба со готовината
„Изгледите на авиопревозникот за тековната финансиска година покажуваат чувство на доверба. Со нето-биланс на готовина и готовина од работењето, според наше мислење, веројатно ќе го покријат капиталот на тековна основа и очекуваме да следува поврат на готовина, иако сè уште нема вести за тоа“, рече Алекс Ирвинг, аналитичар на „Бернштајн“ (Bernstein), во својата белешка до клиентите.
Финансискиот директор на компанијата изјави дека е уверен дека компанијата ќе ја постигне својата цел да превезе 185 милиони патници оваа година, дури и откако „Рајанер“ предупреди дека бројот може да биде малку помал поради доцнењата од „Боинг“ (Boeing Co), единствениот снабдувач на неговите авиони. Авиокомпанијата превезе 168,6 милиони патници во фискалната година која штотуку заврши, што претставува скок од 74 проценти.
Авиокомпанијата соопшти дека билетите за летово се поскапи од минатата година, со цени од 10 проценти над нивото пред пандемијата. Сорахан рече дека дополнителниот приход за некои услуги, како приоритетен влез и храна за време на летот, биле многу силен, зголемувајќи се на 23 евра по патник, споредено со 19 евра од периодот пред пандемијата.
Грешки на „Боинг“
„Рајанер“ е најголемиот купувач на „Боинг“ во Европа, кој ја изгради целата своја флота на авиони на кратки релации со моделот 737. Главниот извршен директор Мајкл О’Лири го критикуваше доцнењето на испораките на авиони бидејќи „Боинг“ се бори со производствени грешки на авионот.
Затворањето на некои европски авиопревозници во периодот на ковид и намалената работа на други создадоа дополнително место за „Рајанер“. Како пример Сорахан го наведе растот на домашните летања во Италија, каде што работата на „Алиталија“ ја продолжи помалата авиокомпанија ИТА, потоа во Грција и другите сончеви точки во Европа, што ја поттикна побарувачката ова лето. Долгорочно, Сорахан очекува авиопревозникот да расте во Германија, Мароко и Скандинавија.
.webp){kind=icon}
