.webp){kind=icon}
Драстичен раст на увезените количества нафтени деривати имало во Македонија во текот на минатата година, а најмногу се трошело дизел-гориво. Според податоците на Регулаторната комисија за енергетика, лани биле увезени 1.321.597 тони нафтени деривати, што е за 21,18 проценти повеќе во однос на увезените количества нафтени деривати во 2021 година (1.090.610 тони).
Во 2022 година најмногу е увезено дизел-гориво, односно 63,63 проценти од вкупниот увоз, потоа следуваат мазутот, моторните бензини, пропан-бутанот (ТНГ), млазното гориво, екстра-лесното гориво (ЕЛ-1) и има мал процент на увоз од биогориво.
Забележливо е дека увозот на нафтените деривати во 2022 година бележи зголемување во однос на претходната година. Кај бензините има зголемување на увезените количества за 10,48 проценти во однос на 2021 година, увозот на дизел-горивата во 2022 година е зголемен за 11,94 проценти споредено со претходната година. Намалување од 11,08 проценти се забележува кај екстра-лесното гориво (ЕЛ-1) и кај течниот нафтен гас (ТНГ) од 6,73 проценти, додека значителен е порастот во увозот на мазутот во 2022 година од 111,28 проценти, како и на млазното гориво од 67,95 проценти, споредено со 2021 година. Тоа се должи на користењето мазут поради енергетската криза, како и враќањето на авиолетовите по паузата поради ковид-19.
Во потрошувачката на нафтените деривати на домашниот пазар во 2022 година доминираат дизел-горивата со 62,20 проценти и мазутот со 19,89 проценти, а дури потоа следуваат безоловните бензини, со учество од 9,27 проценти, и течниот нафтен гас, со 5,57 проценти.
Најголем увозник минатата година, како и претходните, е „Окта“, која учествува со 75,84 проценти, потоа следуваат „Супертрејд“, „Лукоил Македонија“, „ОМ петрол“, „Црна Река петрол“, РКМ и другите трговци со помалку од 5 проценти учество во вкупниот увоз на нафтени деривати во 2022 година.
Во текот на 2022 година, трговците на големо со сурова нафта, нафтени деривати, биогорива и горива за транспорт го вршеле увозот на нафтените деривати во Македонија од девет држави, при што најмногу нафтени деривати биле увезени од соседните држави, меѓу кои доминира увозот од Грција (86,46 проценти од вкупните увезени количества).
Во Македонија тековно работат околу 376 бензински пумпи. И покрај фактот што денес значително е променета сопственичката структура во малопродажниот сектор, „Макпетрол“ поседува најголем број бензински пумпи, и тоа 126. Потоа следуваат „Лукоил Македонија“ со 35 бензински пумпи, „Окта бренд“ со 27 бензински пумпи, додека преостанатите околу 188 бензински пумпи се во сопственост на повеќе други домашни претпријатија.
Набавката и продажбата на нафтените деривати Македонија, во текот на 2022 година, активно ги вршеле 26 правни субјекти лиценцирани за трговија на големо со сурова нафта, нафтени деривати, биогорива и горива за транспорт.
„Дел од претпријатијата што поседуваат бензински пумпи, покрај основната дејност да продаваат горива на своите бензински пумпи, се јавуваат и како трговци на големо, односно дел од набавените течни горива не продаваат преку бензинските пумпи, туку им го продаваат директно на крајни потрошувачи“, објаснуваат од Регулаторната комисија за енергетика.
Најголем удел во продажбата на домашниот пазар (преку бензински пумпи и до крајните потрошувачи) има „Макпетрол“, 27,85 проценти, по што следуваат РКМ, со 15,22 проценти, и „Супертрејд“, со 10,88 проценти.
Извозот на нафтените деривати од Македонија во 2022 година изнесува 288.723 тони и во однос на 2021 година (196.069 тони) е зголемен за 47,26 проценти. Најголем извозник на нафтени деривати во 2022 година е „Окта“, со учество од 82,55 проценти во вкупниот извор, а на второто место е „Макпетрол“, со учество од 9,02 проценти.
