Се намалува активноста: Сѐ помалку луѓе бараат работа во Македонија

Невработеноста во вториот квартал од 2025 понатамошно благо се намали на 11.5 отсто (од 11.7 отсто). Но, во овој квартал, се намали и активноста на населението на 52.2 отсто (од 52.4 отсто), како резултат на што се намали вработеноста на 46.2 отсто (од 46.3 отсто), се наведува во најновиот квартален монитор на институтот „Фајнанс тинк“.

„Овие движења упатуваат на зголемување на воздржаноста на пазарот на труд. Сепак, губењето 1,000 работни места во нето износ во однос на претходниот квартал е секторски хетерогено. Најмногу работни места се изгубени во ИТ секторот (над 4 илјади, поради глобални секторски трендови) и јавната администрација (над 3 илјади), а креирани се работни места во градежништвото (над 4 илјади), хотели и ресторани (близу 4 илјади) и земјоделството (над 3 илјади), односно секторите со солиден реален раст на додадената вредност“, констатираат експертите од „Фајнанс тинк“.

Државната статистика неделава објави дека бројот на непополнети работни места во второто тримесечје достигна рекордни 10.323 слободни работни места.

„Стапката на слободни работни места во второто тримесечје од 2025 година изнесува 2,08 проценти, а најголем број на слободни работни места, 2.008, има во петтата група занимања: работници во услужни дејности и продажба. Југоисточниот Регион има највисока стапка на слободни работни места од 2,54 проценти“, соопшти статистиката.

Во однос на растот на БДП за 3,4 отсто на годишна основа, од „Фајнанс тинк“ велат дека тоа е благо забрзување во однос на динамиката од претходните квартали.

„Остварувањето е во линија со нашите очекувањата изразени во претходниот Макроекономски монитор и проекцијата од 3.5 отсто за целата 2025 година. Забрзувањето е, во голема мера, водено од растот во личната потрошувачка (3 отсто), која продолжи да го отсликува позитивниот реален раст на платите, растот на пензиите и другите доходи и интензивираната кредитна поддршка на домаќинствата. Додека, јавната потрошувачка (-1 отсто) се намали по интензивирањето во текот на 2024. Растот на бруто вложувањата (6 отсто) останува високо варијабилен, додека, извозот (9.1 отсто) и увозот (8 отсто) закрепнаа по продолжен период на стагнација и падови, но варијабилноста и понатаму ги одразува неизвесностите кај трговските партнери на европскиот континент и од царинската политика на САД. На производната страна, растот во овој квартал е на широка основа како и претходно, со благи забрзувања кај земјоделството (1.8 отсто) и индустријата (3.9 отсто), а задржување на динамиката кај градежништвото (7.3 отсто) и услугите (2.7 отсто)“, велат од институтот.

Во вториот квартал од 2025, инфлацијата благо забави на 3.8 отсто на годишна основа (од 4.2 отсто), но и понатаму остана висока. Опстојувањето е сè повеќе сврзано со ефектите од порастот на реалните доходи врз потрошувачката (раст на базичната инфлација од 4.9 отсто). Овие ризици налагаат потреба од понатамошна претпазливост и од фискалната и од монетарната страна, велат од „Фајнанс тинк“.

„Динамиката на економијата од овој квартал се очекува да продолжи во текот на 2025 година. Ризик за растот остануваат глобалните неизвесности, а на домашната сцена основен ризик е упорната инфлација. „Фајнанс тинк“ останува на проекцијата за реален раст на БДП во 2025 од 3.5 отсто, додека проекцијата за растот на цените се ревидира на 3.7 отсто (од 3.1 отсто)“, стои во соопштението.

Во моментов нема коментари за веста. Биди прв да коментира...

Остави коментар