Стапката на невработени во Македонија падна на рекордни 11,5 проценти

Бројот на невработени лица во Македонија во второто тримесечје од 2025 година изнесувал 91.337, што е намалување за 1,3 проценти во споредба со првото тримесечје од 2025 година и за 7,2 проценти во споредба со истото тримесечје од минатата година, соопшти Државниот завод за статистика. Стапка на активност изнесува 52,2 проценти, стапката на вработеност 46,2 проценти, стапката на невработеност 11,5 проценти.

Од вкупниот број на невработените лица, невработени мажи се 65,5 проценти, а жени 34,5 проценти. Бројот на вработени лица бележи намалување од 0,1 процент. Од вкупниот број вработени,  57,2 процети се мажи, а 42,8 проценти се жени. Според ДЗС, учеството на неформалната вработеност се зголемува.

„Неформално вработени лица се 98.095 лица, што е за 8,5 проценти повеќе од претходното тримесечје. Најголем број неформално вработени лица, 51,4 проценти, има во секторот земјоделство, шумарство и рибарство и 17,1 проценти во секторот градежништво“, информираат од ДЗС.