.webp){kind=icon}
„Енвидија“ (Nvidia Corp.) е на пат да стане првиот производител на чипови што ќе постигне пазарна капитализација од една илјада милијарди долари, бидејќи прогнозата за нејзините приходи го нагласи огромниот потенцијал за раст од вештачката интелигенција.
Акциите скокнаа за цели четири проценти во претпазарното тргување, искачувајќи се на 404,9 долари, што ѝ дава индикативна пазарна вредност од една илјада милијарди долари. Компанијата ќе биде една од петте американски компании со таква капитализација, приклучувајќи им се на „Алфабет“ (Alphabet Inc.), „Амазон“ (Amazon.com Inc.), „Епл“ (Apple Inc.) и „Мајкрософт“ (Microsoft Corp). Само девет компании на глобално ниво некогаш го постигнале тоа ниво.
„Причината зошто 'Енвидија' гледа толку голема побарувачка и го постигнува овој раст е што всушност ја обезбедува технологијата потребна за сервисирање на овој бран на иновации. Тоа е во пол-позиција во моментов“, рече Зено Мерсер, виш истражувачки аналитичар во „Робо глобал“ (ROBO Global).
Пазарна капитализација на „Енвидија“ / Bloomberg Mercury
„Енвидија“ ги прави чиповите потребни за сложени задачи за пресметување со вештачка интелигенција, чија побарувачка оваа година се зголеми повеќе од двојно, што додаде повеќе од 600 милијарди долари пазарна вредност до крајот на минатата недела.
Во вчерашната двочасовна презентација во Тајван, главниот извршен директор на „Енвидија“, Џенсен Хуанг, претстави неколку производи поврзани со вештачката интелигенција. Широката линија вклучува нов дизајн на роботика, можности за игри, рекламни услуги и мрежен систем. Понатаму, Хуанг откри и платформа за суперкомпјутер со вештачка интелигенција наречена DGX GH200, која ќе им помогне на технолошките компании да создадат наследници на ЧетГПТ (ChatGPT), при што се очекува „Мајкрософт“, „Мета“ (Meta) и „Гугл“ (Google) на „Алфабет“ да бидат меѓу првите корисници.
Највисока пазарна капитализација на најдобрите компании во светот од 1999 година / Bloomberg Mercury
Иако акциите постојано растат оваа година, поддржани од интересот за вештачка интелигенција, најновиот катализатор дојде дури откако компанијата даде прогноза за приходите, што го вчудовиде Волстрит. Компанијата со седиште во Санта Клара, Калифорнија, рече дека очекува да генерира околу 11 милијарди долари од продажба во текот на својот втор фискален квартал, што е многу повеќе во споредба со прогнозите на аналитичарите од 7,2 милијарди долари.
„Во повеќе од 15 години што ја работиме оваа работа никогаш не сме виделе траса како таа што ја постави 'Енвидија'“, рече аналитичарот од „Сенфорд“ (Sanford C. Bernstein), Стејси Расгон.
