„ЏП Морган“ (JPMorgan Chase & Co.) тивко изгради глобален сектор што им служи на богатите клиенти и нивните инвестициски фирми, во обид да ги прошири своите услуги кон најбогатите во светот.
Овој оддел, кој беше основан непосредно пред пандемијата и на чело со ветеранот на „ЏП Морган“, Енди Коен, сега има околу триесет луѓе во САД, Азија и Европа, а исто така тесно соработува со инвестициските и приватните банки на оваа компанија со седиште во Њујорк.
Одделот се вика „23 вол“ (23 Wall), во чест на локацијата на некогашното седиште на оваа банка на Менхетн, спроти зградата на Њујоршката берза. „Фокусот на секторот е на околу 700 семејства со богатство од повеќе од 4,5 билиони долари„, вели Коен.
„Го изградивме оваа одделение од темел“, рече Коен во интервју во канцеларијата во Лондон. „Ќе продолжиме да растеме“, додаде тој.
Светските банки се натпреваруваат за голем дел од богатството што е создадено во изминатите неколку години, што поттикна жестока трка по најбогатите луѓе во светот. Приватната банка „ЏП Морган“ отвори 40.000 нови сметки во изминатите 10 недели, а минатата година на дневна основа имаше по еден нов клиент со средства од 100 милиони долари или повеќе, рече минатата недела Мери Ердо, извршна директорка за управување со богатството, на денот на инвеститорите на компанијата.
„Голдман Сакс“ (Goldman Sachs Group) исто така е во процес на проширување на своите приватни банкарски услуги, бидејќи сè повеќе се фокусира на т.н. „семејни канцеларии“, а „Ситигруп“ (Citigroup) лани отвори нови канцеларии за приватно банкарство како дел од плановите за зголемување на приходите.
Depositphotos
Овој потег е одговор на најголемите банки на сè покомплексниот начин на кој најбогатите поединци и семејства сакаат да управуваат со своето богатство. Тие сè почесто избираат ентитети што управуваат со семејните средства (анг. family offices), кои се слабо регулирани и обично се занимаваат со управување со имотот на едно богато семејство, или со имотот на неколку од нив.
„Јас сум задолжен за богатството на големи семејни и мултинационални семејни канцеларии“, рече Коен, кој му се приклучи на „ЏП Морган“ пред две децении.
Мишел Чен, поранешна шефица на кинеската дивизија на „ЏП Морган“, премина во друг тим во февруари за да го води „23 вол“ во северна Азија. Фирмата исто така цели на таленти од странство, откако ги регрутираше ветеранот на УБС (UBS Group), Хенри Кнапман, во Лондон минатата година, и поранешниот директор на „Банко Билбао“ (Banco Bilbao Vizkaya Argentaria), Габриел Бочи, во 2021 година, за да се фокусира на клиенти од Латинска Америка.
Коен го води „23 вол“ во соработка со други менаџери на средства во „ЏП Морган“ и управува со тим од менаџери за односи со клиенти, како и тим од професионални инвеститори во десетина града во шест земји, вклучувајќи ги Париз, Хонгконг и Сан Франциско. Речиси половина од неговите клиенти се од САД.
Овој оддел не постави минимален праг на богатство, но јасно е дека им дава услуги на оние што им припаѓаат на најбогатите 0,01 отсто.
„Типични клиенти“
„Портфолиото на нашите типични клиенти се состои од јавни и приватни средства, недвижен имот, а типичните клиенти се заинтересирани за заедницата и за филантропија, како и за приватни зделки“, рече Коен.
Забрзувањето на инфлацијата и зголемувањето на каматните стапки извршија финансиски притисок врз инвеститорите низ светот, но многу членови на ултрабогатите забележаа пораст на своето богатство во 2023 година, главно поттикнати од растот на американските технолошки акции. Според индексот на милијардери на „Блумберг“, комбинираната нето-вредност на 500-те најбогати луѓе во светот се зголемила за уште 500 милијарди долари.
Многу семејни канцеларии сега настојуваат да ги вложат тие пари во приватни компании и акционерски друштва, а некои семејни канцеларии неодамна имаа корист од инвестирањето во технолошки акции за вештачка интелигенција бидејќи секторот цвета.
.webp){kind=icon}
