Македонски менаџери со поголеми плати од буџетите на фудбалските клубови

Лошите резултати на македонскиот спорт, пред сè во кошарката и во фудбалот, не треба да бидат изненадување ако се земат предвид годишните буџети со кои располагаат спортските клубови. Нашата анализа на годишните финансиски извештаи за 2022-та што досега ги објавија клубовите-акционерски друштва преку Македонската берза откриваат поразителни бројки. Тие покажуваат дека повеќето фудбалски и кошаркарски клубови едвај преживуваат, а вистинска реткост се оние што имаат приходи поголеми од милион евра.

Во кошарката и во фудбалот идентична слика

Кошаркарскиот клуб МЗТ Скопје Аеродром АД Скопје лани имал вкупни приходи од 44,8 милиони денари (729.000 евра), а годината ја завршил со загуба од 7,7 милиони денари или околу 125.000 евра. Неговиот најголем ривал, кошаркарскиот клуб Работнички АД Скопје лани имал вкупни приходи од 37 милиони денари (602.000 евра), а добивката на крајот на деловната година изнесувала 5,6 милиони денари или околу 92.500 евра.

Според податоците од берзата, ФК Ренова АД Џепчиште лани имал вкупни приходи од 21,4 милион денари (348.000 евра), а остварил загуба од 47.000 денари или околу 760 евра. ФК Борец АД Велес лани имал вкупни приходи од работењето во износ од 7,7 милиони денари (125.000 евра), а годината ја завршил со загуба од околу 24.000 денари (400 евра).

Светли точки меѓу фудбалските клубови што досега ги објавија финансиските извештаи се АД ФК Академија Пандев и АД ФК Шкендија Тетово. Академија Пандев лани имал вкупни приходи од 51 милион денари (830.000 евра), а добивката изнесувала околу два милиона денари (33.500 евра). АД ФК Шкендија Тетово лани имал приходи од работењето во износ од 198 милиони денари (3,2 милиони евра) и добивка од 15,3 милиони денари (249.000 евра).

Потребни се поголеми вложувања за подобри резултати

За да се долови колку се мали буџетите на македонските спортски клубови добар показател се примањата на менаџерите во некои македонски банки. Пример, во текот на минатата година на петте члена во Управниот одбор на Комерцијална банка на бруто-основа им се исплатени вкупно 82,9 милиони денари (1,3 милион евра) по основа на плати, плата од деловна успешност, регрес, новогодишен надоместок, стручно усовршување, менаџерско осигурување, систематски прегледи и приватно здравствено осигурување.

Еден од најголемите македонски спортисти на сите времиња, фудбалскиот ас Дарко Панчев лани во гостување на телевизијата „Блумберг Адрија“ укажа дека мора повеќе да се вложува во фудбалот во земјава и во регионот и дека надлежните треба да овозможат поголеми олеснувања за компаниите што ќе инвестираат во спортот. Тој смета дека би било корисно доколку земјите од регионот Адрија формираат регионална лига и дека тоа би ги зголемило вложувањата и квалитетот на фудбалот.