„Тојота мотор“ (Toyota Motor Corp.) продаде ЕСГ-обврзница деноминирана во долари за првпат во две години, во обид да го зголеми своето производство на електрични возила за да се натпреварува со „Тесла“ (Tesla Inc).
Јапонскиот производител на автомобили ги подели обврзниците за одржливост вредни 1,5 милијарда долари во три дела, информира упатен извор. Најголемиот дел од понудата, десетгодишна хартија од вредност има камата од 1,08 процентни поени над државните записи, додава изворот, кој побара анонимност бидејќи деталите се приватни.
Интересот вчера бил над 6 милијарди долари до 11 часот по њујоршко време. Според податоците собрани од „Блумберг“, ова е првпат компанијата да го искористи американскиот пазар од инвестициска класа со обврзници што се поврзани со животната средина, социјалата и управувањето - или ЕСГ (од англиски: ESG - environmental, social and governance) од 2021 година.
„Тојота“ не одговори веднаш на барањето за коментар.
„Во иднина ќе гледаме многу повеќе вакви обиди за финансирања поврзани со ЕСГ, особено во автомобилскиот сектор“, изјави во четвртокот Џоел Левингтон, кредитен аналитичар на „Блумберг интелиџенс“. „Поголемиот дел од капиталните трошоци од секторот е насочен кон финансирање на транзицијата кон хибридни и електрични возила.
Аналитичарот очекува дека оперативните маржи на „Тојота“ најверојатно ќе се зголемат исто како што нејзините конкуренти може да се соочат со зголемен притисок од лансирањето нови електрични возила, дополнителна конкуренција од кинеските производители и ценовните тактики на „Тесла“.
„’Тојота’ не потроши многу готовина во брзање да ги надмине своите конкуренти во натпреварот со електрични возила, што е победа за сопствениците на обврзници“, додаде Левингтон.
Производителот на автомобили е меѓу три издавачи што вчера продаваа нови хартии од вредност на американскиот примарен пазар за инвестициска класа. „Дојче банк АГ“ собра 1,25 милијарда долари со обврзница со фиксна до променлива стапка преку својот разгранок во Њујорк, по голем број други издавачи (банки што оперираат во САД, а се регистрирани во други држави - на англиски „Yankee bank“) што го искористија пазарот оваа недела.
Приходите од продажбата, кои производителот на автомобили ги нарекува „обврзници на ткаени планети“, ќе помогнат во финансирањето проекти што се движат од развој и производство на електрични возила со батерии до зелени проекти, како соларната и ветерната енергија, се наведува во известувањето за аукцијата поднесено до Комисијата за хартии од вредност.
Главниот извршен директор на „Тојота“, Коџи Сато, на почетокот на април го откри долгоочекуваниот план за електрификација на возилата на овој производител, ветувајќи дека до 2026 година компанијата ќе продава 1,5 милион електрични возила со батерии годишно и ќе лансира десет нови ЕВ-модели. Во меѓувреме, „Тојота“ сè уште е далеку од производство на електрични возила со ист обем и темпо како „Тесла“ и ривалите во Кина.
Издадените обврзници ќе го тестираат апетитот на инвеститорите во САД, каде што продажбата на одржливи обврзници падна поради политички напад врз инвестирањето во ЕСГ од страна на некои од најголемите имиња во Републиканската партија и зголемената контрола од менаџерите на пари, загрижени дека компаниите ги преценуваат придобивките од овој тип обврзници.
Продажбата ја водат „ЏП Морган Чејс“, (JPMorgan Chase & Co.), Банката на Америка (Bank of America Corp.), „Ситигруп“ (Citigroup Inc.) и „Морган Стенли“ (Morgan Stanley). Од ниедна банка не бил обезбеден коментар.
.webp){kind=icon}
