.webp){kind=icon}
Водечките економии до крајот на годината ќе влезат во рецесија. Ова предупредување деновиве дојде од аналитичарите од јапонската финансиска компанија „Номура“. Тие сметаат дека инфлацијата и мерките на централните банки за нејзино сузбивање ќе придонесат кон забавување на економијата, а во рецесија освен САД, ќе влезат и земјите од еврозоната, Обединетото Кралство, Јапонија, Јужна Кореја, Австралија и Канада. За САД пред три дена и Bloomberg analytics ги зголеми можностите за рецесија до крајот на годината на 38 отсто.
Кои се влезните претпоставки за домашната економија и дали идниот раст на Бруто домашниот производ може да биде засегнат од влошувањето на некои економски параметри. Пред да ги анализираме сите ги прашавме домашните креатори на политики кои секако имаат и целосно нови анализи за економската ситуација, дали кои се показателите за растот на БДП во вториот квартал и кои се очекувањата за тримесечјето што почна. И од Народна банка и од Министерсвто за финансии велат дека засега не се очекува дека ќе навлезема во рецесија (пад на економската активност два квартали по ред) но дека остануваат претпазливи.
Раст од околу три отсто, но и ризици за полошо
Од НБРМ велат дека уште немаат точна проценка за растот во вториот квартал, но податоците за достапните показатели за индустријата, трговијата и градежништвото упатуваат на „задржување на досегашното темпо на раст, коешто во првото тримесечје изнесуваше 2,4 отсто“.
Оттука, НБРМ засега ја задржува проекцијата дека годината ќе заврши со раст на БДП во интервал од 2,7 до 3,2 отсто.
„Сепак, надворешниот контекст е исклучително неизвесен и променлив, во услови на продолжена пандемија и силни геополитички проблеми предизвикани од руската инвазија на Украина. Во вакви околности, ризиците за растот остануваат на надолната страна. Нашето алтернативно неповолно сценарио, упатува на понизок раст од проектираниот во основното сценарио за 1,3 процентни во просек за 2022-2023 година“, велат од НБРМ.
Народна банка
И од Министерството за финансии очекуваат дека годинава ќе заврши со раст од 3,2 отсто и рецесија нема да има. Тоа, велат од таму го потврдиле и бројни експерти, а меѓу ниви нобеловецот Пол Кругман кој неодамна престојуваше во Скопје. Тој во својот говор потенцирал дека големите економии, на чело со САД, се „загреани“ и треба да се „оладат“ и токму тоа се прави во моментов „сите економии спроведуваат мерки во насоока на остстранување на зголемената инфлација која е резултат на ценовни шокови од страна на понудата“.
МИА
„Во таа насока се и мерките кои ги презеде НБРМ чија примарна цел е одржување ценовна стабилност. Истовремено воделот на одржување на финансиската стабилност беа мерките кои сепрезедоа од страна на Владата. Политиките за поддршка на стопанството го лимитираа падот на економската активност, помогнаа во закрепнување на економијата, како и зачувување на работните места“,велат од МФ.
Од април досега НБРМ три пати ја зголемуваше основната камата на благајничките записи. Таа сега изнесува два отсто. Целта на мерката е борба со високата инфлација која заклучно со мај изнесува 11,2 отсто и од ваквите мерки централната банка не очекува негативен ефект врз економијата.
„Преку делување во насока на одржување на ценовната стабилност, централната банка придонесува кон амбиент поволен за одржлив економски раст. Нормализирањето на основната камата се одвива умерено и постепено, со што се превенираат поголеми неповолни ефекти во банкарскиот и реалниот сектор“, велат од НБРМ.
Бизнисмените исплашени од есента
За разлика од властите, бизнисмените се исплашени. Во Организацијата на работодавачи велат дека тоа што ќе се случува оваа есен, ќе остане запишано во историските читанки.
Сегашната позиција е многу полоша од таа во 2020 затоа што пандемискиот период траеше многу долго и предизвика многу трубуленции, војната во Украина дополнително ја клекна економијата, вели за Bloomberg Adria директорката на Раде Кончар – Сервис и претседателката на ОРМ, Владанка Трајкоска.
„Растот на цените на репроматеријалите за производствените капацитети, како што е нашиот, доведува во ситуација да размилсуваме дали на одреден период е неопходно да го прекинеме процесот на работа до стаблизирање на берзанските цени. Од таа причина многу е логично размислувањето дека повеќе компании ќе бидат на исто размислување како ние. Проблемите предизвикани од високата цена на репроматеријалите, високата цена на енергијата, како и зголемените проблеми во синџирите на снбдување не водат во насока да размислувамедека во оваа година на предизвици, есента ќе биде најтешка за економијата“, вели Трајкоска.
Македонија се уште не се заздрави од падот кој го донесе корона кризата. Во 2020 БДП падна за 6.1 отсто што во пари ја чинеше земјава 760 милиони евра. Лани забележан е раст од над 4 отсто, но загубата се уште не е елиминирана. Податоците на статистика за индустријата и трговската размена се позитивни, но главно се должат на енергетската криза.
Имено, зголеменото производство на струја дома го зголеми индустриското производството токму во делот на копањето јаглен и снабдувањето со струја.
Бројките пак за трговската размена покажуваат дека се зголемува тргоовскиот дефицит и дека увзот заради скапите енергенси расте многу побрзо од извозот.
