Грчкиот конзорциумот ППЦ-Aрхиродон (PUBLIC POWER CORPORATION S.A. - Greece & ARCHIRODON GROUP N.V. – Greece) даде најповолна понуда за изградба на големиот хидроенергетски проект „Чебрен“, инвестиција тешка една милијарда евра. Владата на последната седница одлучи токму овој конзорциум да ја добие концесијата за користење вода за производство на електрична енергија со изградба на хидроелектрични централи на Црна Река, објави грчки Катимерини.
Како што стои во денешното соопштение од АД Електрани на Северна Македонија (ЕСМ), хидроцентралата „Чебрен“ беше предизвик години наназад за експертите во енергетиката, архитектурата, градежништвото и предизвик за државата и нејзините чинители задолжени за спроведување на овој голем проект во дело.
„ЕСМ и управниот одбор на компанијата се горди што во нивни мандат се прави еден сериозен и издржан чекор во правец на реализација на „Чебрен“. Државата и ЕСМ имаат стручна и секаква друга подготвеност за овој исклучителен инсфраструктурен објект да почне да се гради“, се наведува во соопштението.
Хидроцентралата „Чебрен“ е инвестиција по принципот на јавно-приватно партнерство, во кое ЕСМ ќе биде јавниот партнер во име на државата.
Проценетата вредност на инвестицијата е околу една милијарда евра со која е предвидена изградба на реверзибилна хидроцентрала „Чебрен“, со инсталиран капацитет од најмалку 333 MW.
„ХЦ 'Чебрен' е предвидено да има функција на производство на електрична енергија, како и режим на пумпање и враќање на водата назад со што на Црна Река предвидено е создавање ново вештачко езеро, кое ќе биде најголемо во нашата држава. По завршување на проектирањето, и обезбедувањето на потребните документи се очекува да се почне со градба која е предвидена да трае седум години“, појаснуваат од ЕСМ.
Од државната компанија уште велат дека „Чебрен“ е од исклучително значење за енергетската транзиција на земјава и регионот, поради можноста за балансирање на обновливите извори на енергија. Воедно, ќе има огромно значење и за заштита од поплави, водоснабдување, земјоделие и слично со висина на браната од 192 метри, со што ќе биде една од највисоките во светот.
„Во контекст на енергетската трансформација и чистите извори на електрична енергија, треба да се каже дека овој проект ќе ни овозможи во иднина да го намалуваме производството од јаглен, и базната енергија постепено да ја супституираме со производството од оваа голема хидроелектрана“, велат од ЕСМ.
Идејата и проектирањето за големиот хидроенергетскиот проект „Чебрен“ започнува со првите физибилити студии во 60-тите години. Досега имало 13 неуспешни тендери во период од последните 20 години. Постојниот Јавен повик е четиринаесетти обид за доделување концесија на Црна Река.
.webp){kind=icon}
