.webp){kind=icon}
Американската Комисија за хартии од вредност (SEC) се обидува да го принуди Илон Маск да сведочи за купувањето акции на „Твитер“ (Twitter) пред да ја преземе компанијата.
Регулаторот во четвртокот соопшти дека Маск минатиот месец не одговорил на поканата да сведочи и побара од судот да го принуди да го стори тоа. Агенцијата ги разгледува изјавите и поднесоците на Маск за купување и продавање акции, се вели во поднесокот што ова тело го поднесе во федералниот суд во Сан Франциско.
СЕК започна истрага во април 2022 година и побара илјадници документи од Маск и други страни, се посочува во соопштението. Милијардерот веќе испратил стотици документи и сведочел двапати во јули 2022 година, се вели во извештјот. Истрагата е затворена за јавноста.
„СЕК веќе неколку пати доби сведочење oд г-дин Маск во оваа несериозна истрага - и доста е“, рече адвокатот на Маск, Алекс Спиро.
Маск се согласил да даде изјава за СЕК минатиот месец, соопшти агенцијата. Сепак, два дена пред закажаното сослушување на 15 септември, Маск поднел неколку приговори, меѓу кои и дека Сан Франциско не е соодветна локација. Инспекторите предложиле нови датуми и се согласиле да се одржи сослушувањето во Форт Ворт, Тексас, во близина на местото каде што сега живее Маск, но тој тогаш одбил и воопшто да се појави, се открива во поднесокот.
ДИК ретко се обраќа до судот за помош, а судовите честопати се на страната на регулаторите кога тоа го прават, рече во интервју Марк Фагел, професор на Правниот факултет на Универзитетот Стенфорд и поранешен функционер на СЕК во Сан Франциско.
„Голем чекор е кога СЕК излегува во јавност и открива дека истражува нешто“, додаде Фагел.
Пред да го купи целиот „Твитер“, Маск најпрво купи 9,2 отсто од акциите на компанијата во март 2022 година. Потоа го пријави купувањето во СЕК во април. Правилата на агенцијата обично бараат од луѓето кои купуваат повеќе од пет проценти од акциите на котирана компанија да го известат СЕК во рок од 10 дена.
Bloomberg
Додека Маск го зголемуваше својот удел во „Твитер“, СЕК испрати барање до милијардерот во април 2022 година за тоа како пријавил сопственост. Дописот од Канцеларијата за аквизиции и преземања на СЕК се фокусира на формуларот што инвеститорите мора да го поднесат кога ќе стекнат удел од повеќе од пет проценти во компанија, за што „Блумберг“ и претходно известуваше.
Маск, кој моментално е најбогатиот човек во светот, сега раководи со шест компании, меѓу кои и „Тесла“ (Tesla Inc), „Твитер“ (Twitter Inc.) и „Спејс екс“ (SpaceX), кој има и големи договори со Владата. Со текот на годините, тој често имаше проблеми со регулаторот за хартии од вредност, кој навредливо го нарекува „Комисија за богатење на шортселери“ (анг. Shortseller Enrichment Commission, а скратено исто така SEC).
Во 2018 година, Маск се согласи да плати казна од 20 милиони долари, да се откаже од своето место во одборот на директори на производителот на автомобили и за идните твитови за компанијата да разговара со внатрешен надзорен орган. Ова се случи откако СЕК ги испита неговите коментари за плановите да ја повлече компанијата од берзата.
СЕК исто така ја истражува улогата на Маск во креирањето на тврдењата на „Тесла“ за автомобили со системи за автономно возење. Претставниците на СЕК размислуваат дали Маск можеби дал несоодветни изјави за иднината, објави „Блумберг“ во јануари.
