.webp){kind=icon}
„Тикток“ (TikTok) на „Бајт денс“ (ByteDance) се приклучи кон низата отпуштања во технолошките компании со кратење приближно 60 работни места, главно во одделите за продажба и за рекламирање.
Погодените работни места се во канцелариите во Лос Анџелес, Њујорк, Остин и во странство, изјави портпаролот на компанијата. Бројката претставува помалку од еден процент од околу 7.000 вработени во компанијата во САД заклучно со март и е едно од помалите кратења што неодамна ги спроведоа големите технолошки компании.
„Алфабет“ (Alphabet Inc.) отпушта десетици вработени во својот оддел „Екс муншот“ (X moonshot), набрзо откако неодамна елиминира стотици работни места во тимови, вклучувајќи ги и хардверот и Гугл асистент (Google Assistant). „Ибеј“ (eBay Inc.) исто така укинува приближно 1.000 работни места, или девет проценти од вработените со полно работно време, додека „Рајот гејмс“ (Riot Games Inc) на „Тенсент“ (Tencent Holdings) ја намалува својата работна сила за 530 работни места, опишувајќи го овој потег како „неопходност“.
За отпуштањата во „Тикток“ прво известија од НПР (NPR). За „Бајт денс“, прашањата од американските законодавци за врските на „Тикток“ со кинеската компанија и наводните врски со Пекинг имаа мало влијание врз растот на компанијата.
Апликацијата сè уште привлекува милиони корисници и гледа на САД како најпрофитабилен пазар, додека нејзиниот близнак Доујин (Douyin) се грижи за домашната публика во Кина. Апликацијата имаше 150 милиони корисници во САД до март минатата година и стана првата мобилна апликација што не е игра а генерирала потрошувачка од 10 милијарди долари, според податоците од апликацијата за следење податоци Дата еј-ај (data.ai).
