„Оилко“ ја симна границата за успешност на преземањето на „Макпетрол“ од 50.000 на 100 акции

„Оилко“ направи две измени на понудата за преземање на „Макпетрол“ со кои се пролонгира рокот за прифаќање на понудата и се намалува количеството акции што треба да се откупат за понудата да се смета за успешна.

„Комерцијална банка“ во име на „Оилко“ преку Македонската берза ги соопшти измените на понудата. Со првата измена рокот за прифаќање на понудата за преземање се менува од првичните 28 календарски дена од денот на објавата на понудата на 35 календарски дена. Според тоа, првичниот рок, кој беше од 22 февруари до 20 март годинава, се поместува до 27 март.

Со втората измена, износот на најмалото количество акции за кои треба да биде прифатена понудата за таа да се смета за успешна се намалува од првичните 50.000 на 100 акции.

Според првата верзија на понудата, со откупот на најмалку 50.000 акции односно 44,49 проценти од сопственоста на „Макпетрол“, „Оилко“ и физичките лица што дејствуваат со него требаше да поседуваат 69,85 проценти од вкупниот број акции од „Макпетрол“. По измените, понудата ќе се смета за успешна ако „Оилко“ откупи најмалку 100 акции односно 0,09 проценти од вкупниот број акции од „Макпетрол“, со што „Оилко“ и физичките лица што дејствуваат со него би поседувале најмалку 25,45 проценти од „Макпетрол“.

„Блумберг Адрија“ веќе пишуваше дека понудата за преземање се однесува на 72.644 обични акции со право на глас, издадени од ,,Макпетрол“ АД - Скопје, кои не се во сопственост на „Оилко“ и физичките лица што дејствуваат заеднички со него.

„Макпетрол“ има издадено 112.382 обични акции со право на глас, од кои 11.238 се сопствени акции, без право на глас, а 28.500 обични акции, со право на глас, се во сопственост на „Оилко“ - Скопје и физичките лица што дејствуваат заеднички со него. „Оилко“ сака да ги преземе преостанатите акции од „Макпетрол“ по цена од 67.001 денар за акција.