.webp){kind=icon}
Извршниот директор на „Тесла“, Илон Маск, ќе ја посети Индија и ќе се сретне со премиерот на земјата Нарендра Моди. Тоа предизвика шпекулации дека американската компанија планира да инвестира во Индија непосредно пред да започне изборниот процес.
Се очекува Маск да ја посети Индија месецов, објави „Економикс тајмс“ откако милијардерот објави за тоа на мрежата Х (која ја поседува). Еден од најбогатите луѓе во светот тогаш најверојатно ќе ги открие своите инвестициски планови, кои вклучуваат изградба на фабрика на „Тесла“, пишуваат медиумите.
Моди ќе се обиде да го освои својот трет мандат, а изборите ќе започнат подоцна месецов. Фокусот на неговата кампања ќе биде ставен на привлекување глобален капитал од низа различни индустрии (од енергија, преку технологија, до транспорт), што ќе создаде милиони работни места за младите луѓе.
„Тесла“ долго време размислува за основање фабрика за електрични возила во Индија. Земјата е трет најголем испуштач на стакленички гасови, а властите планираат да ја направат јаглеродно неутрална до 2070 година.
