Компанијата „Мета“ (Meta Platforms) додава нови функции за вештачка интелигенција на својата апликација за пораки Ватсап (WhatsApp), вклучително и асистент со вештачка интелигенција што може да им помогне на бизнисите да се поврзат со клиентите, да одговараат на прашања и да ги продаваат нивните стоки и услуги преку чет.
Ватсап наскоро ќе го тестира новиот асистент со вештачка интелигенција со бизниси во Индија и Сингапур, а потоа и Бразил. Ватсап веќе вклучува асистент со вештачка интелигенција за редовните корисници, но овие нови производи се направени специјално за бизниси кои редовно се справуваат со прашања и интеракции од клиентите. Новите функции ќе поддржат повеќе од 200 милиони бизниси кои се потпираат на Ватсап за да разговараат со своите клиенти, соопшти компанијата.
„Секој бизнис треба да може брзо да се потпре на агент кој може да разговара со неговите клиенти, да обезбеди поддршка и да ја олесни трговијата“, рече главниот извршен директор на „Мета“, Марк Закерберг во четвртокот кога го најави новиот асистент за време на настан во Сао Паоло.
Ватсап, кој има повеќе од 2 милијарди корисници ширум светот, е особено популарен во места како Бразил, Индија, Индонезија и Мексико, каде што е вообичаено луѓето да разговараат со локални бизниси кои ја користат услугата. На пример, повеќе од 120 милиони луѓе користат Ватсап во Бразил секој месец.
Компанијата, исто така, планира следниот месец да лансира верзија на својот асистент Мета еј-ај (Meta AI) фокусиран на потрошувачите на португалски. Мета еј-ај, која се напојува со големиот јазичен модел на компанијата познат како Лама (Llama), може да одговори на прашањата на корисниците на Фејсбук (Facebook), Инстаграм (Instagram) и Ватсап.
„Мета“, која го купи Ватсап во 2014 година за 19 милијарди долари, бара повеќе начини за монетизација од својата популарна апликација за пораки. Деловната верзија на апликацијата моментално е бесплатна, но нуди некои платени функции. Компанијата, исто така, заработува пари со тоа што им наплаќа на бизнисите да испраќаат некои пораки до нивните клиенти и со продажба на реклами на Инстаграм и Фејсбук кои се поврзуваат со разговор на Ватсап, наречени click-to-message реклами.
Маркетарите наскоро ќе можат да ги креираат тие реклами користејќи вештачка интелигенција, објави компанијата во четвртокот. Мета моментално ја тестира таа функција на пазарите каде што се говори англиски, како што се САД и Сингапур, со планови за дополнително проширување. Закерберг претходно изјави дека рекламите за клик-за-порака може да генерираат 10 милијарди долари годишно за „Мета“.
.webp){kind=icon}
