„Мајкрософт“ воведува услуги со вештачка интелигенција за слепи лица

„Мајкрософт“ (Microsoft Corp.) планира да се здружи со „Би мај ајс“ (Be My Eyes), апликација за слепи и лица со слаб вид, за да им го олесни пристапот на тие луѓе до корисничката служба на компанијата.

Основана во 2015 година, „Би мај ајс“ ги поврзува луѓето со оштетен вид со волонтери што можат да им помогнат да исполнат одредени обврски што инаку не би можеле да ги направат самостојно. Стартапот исто така има алатка за вештачка интелигенција наречена „Би мај еј-ај“ (Be My AI), која го користи моделот ЧетГПТ-4 (ChatGPT-4) за да генерира опис на фотографиите што ги направило едно лице - без разлика дали е етикета на производ или производ во продавница.

Софтверскиот гигант со седиште во Редмонд, Вашингтон, ќе ја интегрира технологијата „Би мај еј-ај“ во својот „Мајкрософт дисабилити ансер деск“ (Microsoft Disability Answer Desk), кој се справува со повиците до корисничката служба, се наведува во соопштение од „Би мај ајс“. Соработката ќе им овозможи на корисниците на производите на „Мајкрософт“ што се слепи или со оштетен вид да решаваат проблеми со хардверот или да извршуваат задачи како што се инсталирање нова верзија на софтверот „виндоус“ или опишување презентација на „пауер поинт“ - сето тоа без човечка помош.

На конференцијата за основачи на стартап-компании, Сем Алтман ја пофали одлуката на „Би мај ајс“ да користи технологија ГПТ-4, која ја развива „Опен еј-ај“ (OpenAI), наведувајќи ја компанијата како пример за тоа како јазичниот модел на неговата компанија може да користи слики како прашања и да дава вербализирани одговори.

„'Опен еј-ај' е горд што е партнер со 'Би мај ајс'. Тие ги користaт нашите модели со вештачка интелигенција за значително да го подобрат секојдневниот живот на луѓето што имаат оштетен вид или се слепи“, рече Бред Лајткап, главен извршен директор на „Опен еј-ај“.

„Би мај ајс“, која во текот на годинава ја тестираше визуелната услуга за клиенти базирана на вештачка интелигенција со корисниците на „Мајкрософт“, откри дека само 10 проценти од луѓето што комуницирале со вештачката интелигенција побарале да го препратат барањето до човечки оператори. Компанијата исто така посочи дека прашањата се решавале побрзо со помош на алатката „Би мај еј-ај“, при што корисниците трошеле просечно четири минути зборувајќи со вештачката интелигенција во споредба со 12 минути со човек.

Во моментов нема коментари за веста. Биди прв да коментира...

Остави коментар