.webp){kind=icon}
Производителите на автомобили во Европа продадоа 2,6 отсто помалку возила во мај споредено со пред една година, бидејќи купувачите не ги прифаќаат сè уште високите цени на електричните модели.
Регистрациите на нови автомобили паднаа на 1,09 милиони минатиот месец, објави во четвртокот Европската асоцијација на производители на автомобили. Продажбата на електрични возила падна за 11 отсто поради падот на неколку големи пазари, а се намали и нивниот удел во вкупните продажби.
Високите трошоци за задолжување и слабиот раст ширум Европа влијаат на расположението на потрошувачите. Производителите на автомобили се борат со бавната продажба на електрични возила бидејќи возачите го одложуваат купувањето поради високите цени и лошата инфраструктура за полнење. Потегот на Европската унија овој месец да воведе дополнителни царини за кинеските електрични возила се заканува да ги поскапи увозните алтернативи.
„Пазарните претпоставки за електричните возила „беа премногу оптимистички“, велат аналитичарите на „Сити“ предводени од Харалд Хендрикс. „Инвестициите мора да се намалат“.
Bloomberg Mercury
Високите цени станаа главна пречка за растот на продажбата на електричните возила во Европа, откако земјите како Германија и Шведска ги прекинаа или намалија субвенциите. Производителите „Фолксваген“, „Стелантис“ и „Рено“ подготвуваат поевтини модели по цена од околу 25.000 евра (26.865 долари), но тие нема да пристигнат до следната година.
Уделот на продажбата на електрични возила во регионот падна за еден процентен поен во мај на 14 отсто од вкупната продажба, во услови на двоцифрен пад на пазарите вклучувајќи ги Германија, Шведска и Норвешка. Продажбата на хибриди падна за 9,6 отсто.
Некои производители на автомобили почнаа да ги приспособуваат своите цели за електрични возила, при што „Стелантис“ и „Мерцедес“ ја прекинаа работата на две фабрики за батерии за електрични возила во Германија и Италија. „Фолксваген“ минатиот месец призна дека ќе има потреба од повеќе хибриди, додека „Мерцедес“ планира да продава автомобили со мотори со внатрешно согорување подолго од очекуваното.
Инфлацијата и високите каматни стапки, исто така, остануваат пречка за големите купувања. Европската централна банка ги намали стапките на почетокот на овој месец, но не посочи дека може да следат дополнителни намалувања.
Bloomberg Mercury
„Фолксваген“ и „Тојота“ беа меѓу ретките производители на автомобили на масовниот пазар кои успеаја да ја зголемат продажбата во мај, со добивки од 1,8 и 8,2 отсто, соодветно.
Регистрациите на „Тесла“ во регионот падна за 36 отсто минатиот месец, што е голем пад што ги продолжува лошите перформанси на производителот на електрични возила во вториот квартал. Продажбата на компанијата падна за околу 14 отсто по првите пет месеци од оваа година.
Со оглед на тоа што побарувачката ја надмина понудата од втората половина на 2020 година, промената на тој тренд „е клучен ризик во индустријата оваа година бидејќи производството на возила се нормализира и нарачките се намалуваат“, велат аналитичарите на „Блумберг Интелиџенс“ Џилијан Дејвис и Мајк Дин.
