Емисиите на „Гугл“ (Google) пораснаа за речиси 50 отсто во последните пет години. Причината за тоа е имплементацијата на вештачката интелигенција во многу клучни производи - што го отежнува постигнувањето на целта за елиминирање на емисиите на јаглерод диоксид до 2030 година, се наведува во новиот еколошки извештај на овој технолошки гигант.
Годишниот извештај беше објавен во вторникот и го опфаќа напредокот на „Гугл“ во исполнувањето на еколошките цели во изминатата година. „Гугл“, кој е дел од „Алфабет“ (Alphabet Inc.), соопшти дека неговите емисии на стакленички гасови изнесуваат 14,3 милиони метрички тони еквивалент на јаглерод диоксид во текот на 2023 година. Тоа е 48 отсто повеќе отколку во 2019 година и 13 отсто повеќе отколку во 2022 година, соопшти компанијата.
Иднината е неизвесна
„Гугл“ посочи дека причина за поголемата потрошувачка на енергија во неговите центри за податоци и зголемените емисии се синџирите на снабдување и додаде дека напорите да интегрира вештачка интелигенција во своите производи може да го отежнат намалувањето на емисиите во иднина.
„Како што сè повеќе ја интегрираме вештачката интелигенција во нашите производи, намалувањето на емисиите може да биде предизвик поради зголемените барања за енергија предизвикани од поголемиот интензитет за пресметување кај вештачката интелигенција, како и емисиите поврзани со очекуваното зголемување на нашите инвестиции во техничката инфраструктура“, напиша „Гугл“ во извештајот.
Веќе неколку години компанијата со седиште во Маунтин Вју, Калифорнија, вели дека планира да ги елиминира таквите емисии од своето работење до 2030 година.
Вештачката интелигенција, особено генеративната вештачка интелигенција што зема наредба од корисникот и генерира нова содржина како текст, слики или песни, е исклучително интензивна на ресурси, како што покажа неодамнешната истрага на „Блумберг њуз“ (Bloomberg News). Со забрзаниот раст на оваа технологија, потребна е сè поголема инфраструктура за изградба и управување со вештачката интелигенција, што доведува до зголемување на потребите за електрична енергија.
Масивен раст на вештачката интелигенција
Драматичното зголемување на побарувачката на електрична енергија поради пристапот на Силициумската Долина за раст по секоја цена може да ги загрози плановите за енергетска транзиција на цели земји, како и целите за чиста енергија на технолошките компании од трилиони долари. Во некои земји, вклучувајќи ги Саудиска Арабија, Ирска и Малезија, потребната енергија за управување со целата инфраструктура го надминува расположливото снабдување со обновлива енергија, според анализата на „Блумберг“ заснована на најновите достапни податоци.
„Гугл“ не е првата голема технолошка компанија што го наведува брзиот раст на вештачката интелигенција како пречка за постигнување на еколошките цели. Во мај „Мајкрософт“ (Microsoft Corp.) изјави дека неговите емисии на јаглерод диоксид се зголемиле за 30 проценти од 2020 година, бидејќи компанијата сè повеќе инвестирала во вештачка интелигенција. Тоа зголемување ја направи целта на компанијата за нето-емисии под нулата до 2030 година уште потешка отколку кога беше објавена нејзината цел за негативни емисии.
Саша Лучиони, лидерка за клима во стартапот „Хагинг фејс“ (Hugging Face Inc.), вели дека податоците покажуваат дека технолошките компании не предвидувале огромен раст на вештачката интелигенција кога ги поставиле своите еколошки цели. „Тие не можеа да го направат тоа“, посочи таа.
„Референтната година во тој извештај на 'Гугл' беше 2019 година - тие дефинитивно не го предвидуваа тоа“. Лучиони вели дека компаниите се изненадени и од тоа колку енергија е потребна за да се создаде таква технологија и колку енергија е потребна за нејзино функционирање.
.webp){kind=icon}