Едгар Бронфман Џуниор официјално поднесе понуда од 4,3 милијарди долари за преземање на „Парамаунт“ (Paramount) и откажување на постојна понуда од конкурентот „Скајденс“ (Skydance), изјави за „Блумберг“ лице запознаено со предлогот.
Наследникот на производителот на алкохолни пијалаци „Сиграм“ (Seagram) нуди да ја купи „Национал амусментс“ (National Amusements), семејната холдинг-компанија „Редстоун“, која поседува најголем дел од акциите за гласање на „Парамаунт“, за околу 1,75 милијарда долари, според лицето, кое побара да остане анонимен. „Бронфман“ ќе инвестира дополнителни средства во „Парамаунт“, вклучувајќи 1,5 милијарда долари за намалување на долгот.
Акциите на „Парамаунт“ паднаа за 2,3 отсто, до 10,81 долари, во Њујорк во вторникот наутро.
Матичната компанија на брендовите Си-би-ес, Ем-ти-ви и другите медиумски компании веќе ја прифати понудата на „Скајденс“, на чело со Дејвид Елисон, син на еден од основачите на „Оракл“ (Oracle), Лери Елисон. Нивниот договор за спојување вклучува период од 45 дена, во кој „Парамаунт“ може да разгледа други понуди, кој истекува в среда вечер.
Групата предводена од Елисон понуди 2,4 милијарди долари за „Национал амусментс“ и се согласи да инвестира дополнителни шест милијарди долари за купување акции на „Парамаунт“ и за плаќање на долгот. Исто така таа планира да ги спои „Скајденс“ и „Парамаунт“ преку договор за акции од 4,75 милијарди долари.
Се очекува „Бронфман“ да тврди дека неговата понуда е подобра бидејќи носи помалку „разредување на сопственоста“ за акционерите на „Парамаунт“ надвор од семејството Редстоун.
„Парамаунт“, кој со децении го водеше покојниот магнат Самнер Редстоун, се соочи со проблеми во последниве години бидејќи гледачите сè повеќе се префрлаат од традиционалните телевизиски услуги на стриминг-услугите.
.webp){kind=icon}
Во моментов нема коментари за веста. Биди прв да коментира...