.webp){kind=icon}
„Старбакс“ (Starbucks Corp.) им соопшти на своите вработени во корпоративниот оддел дека може да бидат отпуштени ако не одат на работа во канцеларија три дена во неделата.
Почнувајќи од јануари, „Старбакс“ ќе спроведе „стандардизиран процес“ за одговорност на работниците ако не се придржуваат до политиката на компанијата за враќање во канцеларија, според меморандум испратен до една од дивизиите на компанијата во кој увид имал „Блумберг њуз“ (Bloomberg News). Најлошата последица може да бидe „разделба“, се наведува во е-поштата.
Пораката претставува ескалација во спроведувањето на хибридните работни правила на компанијата помалку од два месеца откако Брајан Никол ја презеде функцијата главен извршен директор. Тој им рече на вработените минатиот месец дека треба да работат каде што можат да ја завршат својата работа, но дека мисли дека тоа место обично е канцеларијата.
„Старбакс“ соопшти дека очекувањата за хибридните работници не се променети и дека одморот, боледувањето и деловните патувања се исклучени од пресметката. Вработените можат да побараат изземање поради физичка, ментална, сензорна или друга попреченост, истакна компанијата. Политиката се однесува на околу 3.500 корпоративни вработени. Повеќето од вработените во компанијата се вработени во нејзините продавници.
„Старбакс“ е последна во низата компании што се префрлија од морков на стап во тековната битка за враќање на работниците во канцеларија. Минатиот месец главниот извршен директор на „Амазон“ (Amazon.com), Енди Џеси, ги изненади вработените со меморандум во кој им наложи да почнат да се пријавуваат на своите бироа пет дена во неделата, почнувајќи од јануари. „Амазон“ моментално им дозволува на многумина од нив да работат оддома два дена во неделата.
Во исто време некои фирми сфатија дека налогот за враќање во канцеларија може да служи како отпуштање во прикриена форма. Во анкета од „Бамбу ХР“ (BambooHR), еден од четворица извршни директори признале дека се надеваат на некој доброволен одлив поради притисокот за враќање во канцеларија. Истражувањата, пак, покажаа дека вработените што даваат отказ поради политиките често се поискусни кадри, кои компаниите најмалку можат да си дозволат да ги изгубат.
Во почетокот на минатата година, кога „Старбакс“ се обиде да го спроведе својот налог за хибридна работа, десетици корпоративни работници потпишаа отворено писмо во кое се спротивставија на идејата.
Работниот аранжман на Никол, кој му дозволува да живее во Калифорнија и да патува 1.000 милји до Сиетл со авион на компанијата, предизвика реакција од некои работници и надворешни критичари. „Старбакс“ соопшти дека Никол ќе го поминува поголемиот дел од своето време во Сиетл или во посета на продавниците. Неколку вработени изјавија дека не им е важно каде е базиран извршниот директор, сè додека не ги заострува барањата за присуство во канцеларија.
„Старбакс“ исто така се оддалечува од барањето вторник да биде заеднички ден за присуство за сите работници во канцелариите и, наместо тоа, ги поставува очекувањата на ниво на тим, се наведува во меморандумот.
