Кина отвори истрага против „Енвидија“ (Nvidia Corp.) поради сомневања дека американскиот производител на чипови ги прекршил антимонополските закони во врска со договор од 2020 година, насочувајќи се кон гигантот за вештачка интелигенција (ВИ) додека и Вашингтон ги засилува санкциите.
Државната администрација за регулација на пазарот отвори истрага за неодамнешното однесување на компанијата, како и за околностите околу аквизицијата на „Меланокс“ (Mellanox Technologies Ltd.), соопшти владата во понеделникот. Пекинг го одобри договорот пред четири години, под услов „Енвидија“ да не дискриминира кинески компании.
Овој потег против „Енвидија“ е најновиот одговор на Пекинг на ескалирачките американски технолошки ограничувања, што доаѓа само една недела откако кинеската влада забрани извоз на неколку материјали со технолошка и воена примена. Пазарната вредност на „Енвидија“ годинава значително порасна поради побарувачката за чипови што можат да поддржат програми за вештачка интелигенција, правејќи ја една од највредните јавно тргувани компании и најголема корпоративна цел на Кина во технолошката трговска војна досега.
Во изјава од „Енвидија“ посочија дека се „среќни да одговорат на сите прашања што регулаторите можат да ги имаат за нивното работење“.
„’Енвидија’ победува по заслуга, што се одразува во нашите резултати и вредноста за клиентите, и клиентите можат да изберат кое решение е најдобро за нив“, посочија од компанијата со седиште во Санта Клара, Калифорнија. „Работиме напорно за да ги обезбедиме најдобрите производи што можеме во секој регион и ги почитуваме нашите обврски секаде каде што работиме“.
Кина го одобри купувањето на „Меланокс“ од страна на „Енвидија“ за 7 милијарди долари во 2020 година, но наложи израелскиот производител на компјутерска мрежна опрема на конкурентите да им обезбеди информации за новите производи во рок од 90 дена од нивната достапност до „Енвидија“.
„Енвидија“ добива околу 15 отсто од своите приходи од клиенти во Кина, според нејзиниот најнов финансиски извештај.
Вашингтон се обидува да го забави развојот на напредната технологија за чипови во Кина и забрани „Енвидија“ да ги продава своите најнапредни полупроводници на тамошни компании. САД исто така ги притискаат сојузниците да преземат слични мерки. Администрацијата на Бајден ја притисна холандската влада да го спречи АСМЛ (ASML Holding NV), кој има монопол на машини што произведуваат најнапредни чипови, не само да ѝ ја продава својата најразвиена опрема на Кина туку и да ја поправа и одржува.
Овие ограничувања за извоз предизвикаа остри критики од Пекинг, кој исто така ги насочи своите мерки кон американските компании. „Микрон“ (Micron Technology Inc.) минатата година предупреди дека околу половина од неговите продажби поврзани со клиенти со седиште во Кина може да бидат погодени од истрага за сајбер-безбедност што ја спроведува кинеската влада. Кинескиот регулатор за сајбер-безбедност рече дека производите на „Микрон“ не успеале да поминат преглед и ги забрани чиповите на компанијата од „критичната инфраструктура“.
.webp){kind=icon}
Во моментов нема коментари за веста. Биди прв да коментира...