„Македонски телеком“: Приходите од продажба ги компензираа зголемените трошоци

„Македонски телеком“ едвај го компензира зголемувањето на оперативните расходи со годишен раст на приходите од продажба од 2 отсто, па конечниот резултат е скромен годишен раст на ЕБИТДА од 0,3 отсто. Ако одиме чекор понатаму, профитабилноста не е на минатогодишното ниво бидејќи ЕБИТДА од 41,7 отсто е за 0,5 процентни поени пониска. Конечно, за растот на финансиските приходи компанијата треба да му се заблагодари на годишниот раст на нето-добивката од 7,6 отсто.

Можеме да кажеме дека четвртиот квартал од 2024 година успеа да донесе вакви резултати за „Македонски телеком“ затоа што на крајот на третиот квартал ЕБИТДА беше помала за 2,4 отсто или ЕБИТДА  беше помала за 1,4 процентни поени.

Приходите беа поттикнати првенствено од мобилните услуги, кои беа зголемени за 3,4 отсто на годишно ниво. Мобилната телефонија го задржа минатогодишниот пазарен удел, но во рамките на категоријата продолжува миграцијата на корисниците од припејд кон постпејд-пакети. Постпејд-пакетите донесоа раст на приходите од 4,6 отсто од говорните услуги. Овој сегмент дополнително беше поттикнат со понудата на нови модели на мобилни уреди, што влијаеше на дополнителните приходи од продажба на опрема, кои пораснаа за 3,6 отсто на годишно ниво. Конечниот резултат е годишен раст на просечните приходи по корисник (ARPU) од 4,2 отсто, достигнувајќи 394 денари. Златната кокошка на „Македонски телеком“ се интернет-услугите, кои на годишно ниво пораснале за 7,4 отсто. Вкупниот број на конекции се зголеми за 3,7 отсто на годишно ниво, што на компанијата ѝ донесе речиси половина од пазарот на широкопојасен интернет. Модернизацијата и проширувањето на мрежната инфраструктура преку оптичката мрежа овозможија 9,6 отсто повеќе пристап отколку во 2023 година.

На страната на трошоците, оперативните расходи се за 2,2 отсто повисоки од претходната година, но речиси се неутрализираат со пониските годишни трошоци за амортизација, така што крајниот ефект на страната на трошоците е раст од 0,5 отсто годишно. Зголемувањето на бројот на вработени поради преземањето работници влијаеше на растот на трошоците за вработените на крајот на 2024 година за 12,1 отсто. Дополнително, компанијата има направено поголеми резерви за тие трошоци. Растот на оваа категорија на трошоци беше донекаде компензиран со намалувањето на цената на суровини и материјали. Предводник на тоа е намалувањето на трошоците за електрична енергија за 25,6 отсто на годишно ниво, како резултат на падот на глобалните цени на електричната енергија.

Во 2024 година Собранието на акционери на „Македонски телеком“ донесе одлука за исплата на бруто-дивиденда од 2.212.067 илјади денари, што претставува зголемување од 33 отсто во однос на претходната година. Дивидендата по акција изнесува 25,65 денари. Цената на акцијата се зголеми за 4,2 отсто, а заработката по акција се зголеми за 7,7 отсто, достигнувајќи 27,62 денари.

 

 

Иако капиталните инвестиции се благо намалени во 2024 година во однос на претходната година, интензивната инвестициска политика ќе му обезбеди на „Македонски телеком“ платформа за раст на приходите од услугите, пред сè од оптика, во 2025 година. Императив е да ја држат под контрола целата категорија на трошоци бидејќи им претстои период на оптимизација. Конечно, ЕБИТДА се очекува да биде повисока во споредба со 2024 година. Врз основа на силната инфраструктура, очекувањата се дека компанијата ќе работи на дигитални производи, со фокус на ИКТ-проектите и, конечно, на поголемата монетарна динамика што ќе дојде од 5Г-услугите.

Во моментов нема коментари за веста. Биди прв да коментира...

Остави коментар