Алгоритамот на Тикток ќе биде под целосна контрола на „Оракл“ во САД

„Оракл“ (Oracle Corp.) ќе креира нова американска верзија на алгоритамот на Тикток (TikTok) и ќе обезбеди нејзина заштита, во рамките на договорот што се подготвува за продажба на популарната апликација во сопственост на Кина на конзорциум од американски инвеститори, изјави официјален претставник на Белата куќа, осврнувајќи се на загриженоста на американските законодавци во Вашингтон.

Договорот, претставен во соопштение во понеделникот, има цел да гарантира дека американските купувачи ќе го контролираат алгоритамот на Тикток во САД по раздвојувањето од кинеската матична компанија „Бајтденс“ (ByteDance Ltd.). Сопствениците на американската верзија на Тикток ќе изнајмат копија од алгоритамот од „Бајтденс“, кој „Оракл“ потоа ќе го развива „од нула“, посочува истиот извор.

Податоците на американските корисници ќе бидат складирани во безбеден облак управуван од „Оракл“, со воспоставени контроли за да се спречи пристап од странски конкуренти, вклучувајќи ја и Кина, соопшти претставникот. „Бајтденс“, чие седиште е во Пекинг, нема да има пристап до информациите за американските корисници на Тикток, ниту пак контрола врз алгоритамот во САД.

Bloomberg

„Оракл“, американскиот партнер за безбедност, ќе го управува, ќе го развива одново и постојано ќе го надгледува новиот алгоритам за да гарантира дека содржината е заштитена од неправилни манипулации или надзор, се наведува во документот Q&A (прашања и одговори).

Алгоритамот на Тикток одамна е клучна пречка за постигнување договор. Американскиот закон со кој се наложува продажбата на Тикток забранува „Бајтденс“ да има каква било оперативна улога во новата американска апликација, вклучувајќи го и софтверот. Кинескиот закон, пак, забранува извоз на таква чувствителна технологија. Не е јасно дали законодавците што поддржаа условено раздвојување ќе го прифатат планот за алгоритамот и дали воопшто е технички изводливо целосното одвојување на Тикток од „Бајтденс“.

Според договорот, „Оракл“ ќе работи во партнерство со американската влада на сè – од развојот на алгоритамот и апликацијата до проверката на изворниот код, изјави претставникот на Белата куќа. Засега не е јасно каква точно улога би имала владата во надзорот врз апликацијата, алгоритамот и корисничките податоци.

Претставникот на Белата куќа изјави дека дел од улогата на „Оракл“ во надзорот на американскиот алгоритам ќе биде „да се спречи неправилна манипулација“, без да наведе повеќе детали.

Информациите за безбедносните механизми дојдоа во момент кога претседателот Доналд Трамп се подготвува да го финализира долгоочекуваниот план за продажба на популарната платформа за споделување видеа на конзорциум американски купувачи. Продажбата би му помогнала на Трамп да исполни едно од предизборните ветувања, а наедно би отстранила и една од клучните пречки во односите меѓу САД и Кина, додека двете најголеми економии во светот се обидуваат да ги ублажат тензиите околу царините и контролата на извозот.

Американскиот претседател има намера неделава да потпише извршна наредба со која ќе ја формализира својата согласност за трансакцијата, изјави претставникот на Белата куќа. Минатата недела Трамп изрази уверување дека сите страни се согласиле. „Имав одличен разговор со претседателот Шји и, како што знаете, го одобрив договорот за Тикток и сме во процес“, им рече Трамп на новинарите во петокот, само неколку часа по разговорот со својот кинески колега Шји Џјипинг. „Очекуваме наскоро да го финализираме договорот.“

Иако Трамп остави впечаток дека Шји дал зелено светло, кинеското министерство за надворешни работи во петочната изјава не отиде толку далеку за целосна поддршка. „Кинеската влада ги почитува ставовите на засегнатата компанија и би била задоволна ако продуктивни комерцијални преговори, во согласност со пазарните правила, доведат до решение што ќе биде во рамките на кинеските закони и регулативи и ќе ги земе предвид интересите на двете страни“, се наведува во соопштението.

За да обезбеди повеќе време за постигнување на договорот, Трамп планира дополнително да го продолжи рокот за продажба на уделот на „Бајтденс“ за уште 120 дена, изјави претставникот на Белата куќа. Минатата недела Трамп веќе потпиша наредба со која рокот беше продолжен за 90 дена, до средината на декември.

Според договорот, новата американска компанија би била во мнозинска сопственост на ненаведени американски инвеститори, додека уделот на „Бајтденс“ би паднал под 20 отсто за да се исполни законската обврска компанијата да се откаже од контролата, изјави претставникот. Шест од седумте места во одборот на американскиот Тикток ќе бидат пополнети со Американци, додаде тој, без да ги открие имињата на директорите. „Бајтденс“ би го задржал последното место во одборот, но би бил исклучен од безбедносниот комитет на новата компанија.

„Оракл“ е меѓу инвеститорите во конзорциумот, кој ги вклучува и „Андрисен Хоровиц“ (Andreessen Horowitz) и приватната инвестициска компанија „Силвер Лејк менаџмент“ (Silver Lake Management), објави претходно „Блумберг“. Редизајнирањето и обезбедувањето на алгоритамот дополнително ќе ја прошират профитабилната соработка на „Оракл“ со Тикток. Компанијата од Остин веќе обезбедува облак-услуги за апликацијата и ги хостира корисничките податоци во САД и други земји како дел од проект вреден неколку милијарди, наречен „Проект Тексас“ (Project Texas).

Плановите за заштита на алгоритамот за препораки (кој одредува кои видеа им се прикажуваат на корисниците) и личните податоци на американските корисници имаат цел да ги отстранат грижите од аспект на безбедноста што се заеднички и за републиканците и за демократите во Конгресот. Со законот што тие го изгласаа, се бара „Бајтденс“ да се повлече од сопственоста или во спротивно апликацијата да се соочи со забрана во САД. Законодавците предупредуваат дека Кина би можела да ја принуди „Бајтденс“ да споделува кориснички податоци и да ја користи апликацијата за ширење пропаганда – обвинувања што компанијата и властите во Пекинг постојано ги негираат.

Конгресмени што ја поддржаа забраната за Тикток ветуваат дека внимателно ќе ги разгледаат сите планови за алгоритамот. Републиканецот Џон Муленар, претседател на Специјалниот комитет на Претставничкиот дом за Кина, минатата недела, откако беше објавена рамката на договорот за Тикток, изјави дека останува загрижен дека договорот „може да вклучува постојана зависност на новиот Тикток од алгоритам и апликација на ‘Бајтденс’, што би можело да овозможи континуирана контрола или влијание од страна на Комунистичката партија на Кина“.

Трамп, пак, предложи САД да добијат дополнителен надомест само затоа што ја овозможуваат зделката. Но деталите како би изгледала таа шема на надомест и колкав процент би земала владата сè уште не се познати.

Во петокот тој одби да каже дали американската влада би имала свое место во управниот одбор на новата компанија.