.webp){kind=icon}
Интернационализацијата на пазарите на работна сила е процес што се одвива во сите земји во светот, посочи во своето гостување на Блумберг Адрија ТВ, Глигор Бишев, претседател на Советот за унапредување на високото образование и стратегиски истражувања на Стопанската комора.
Како што нагласи тој, сите земји во регионот, па и Македонија, најпрво ги отвориле пазарите на стоки и услуги, потоа пазарите на капитал и сега се отвора пазарот на работната сила, и тоа во неговата последна алка, која подразбира можност странски работници и квалификувани лица да се вработат во земјава.
„Во Македонија, и покрај тоа што имаме стапка на невработеност од 14,2 отсто, речиси не можат да се најдат лица за работа во градежништвото, но и во голем број други индустрии, а исто така и во голем број услужни сектори“, истакна Бишев.
Како што нагласи тој, во една ваква ситуација прашањето е како да се задржат талентите во земјата и, ако е можно, да се привлечат таленти и од странство.
„За тоа, покрај условите што ги нудат компаниите, потребни се и повеќе шанси за младите и пат во развојот на кариерата за секој вработен, и тоа не само на ниво на компанија туку и на ниво на општество - да знаете дека она што сте денес нема да бидете и по 10-15 години“, посочи Бишев.
Целиот разговор со него погледнете го во видеото во рамките на објавата.
