.webp){kind=icon}
Циклусот на затегнување на монетарната политика е при крај, но ќе има уште неколку корекции во нагорна линија, смета претседателот на здружението на финансиски пазари „АЦИ Македонија“, Бојан Цветановски.
„ФЕД имаше намери да ја одржи динамиката, но потресите во банкарскиот сектор го забавија тоа темпо. Сепак, сметам дека во случаите со банките како СВБ не станува збор за системски проблем, туку за пропуст кај самите банки, односно нивното управување со билансите. Мислам дека во овој случај сега ФЕД превентивно настапи, но ќе продолжи со зголемување на каматните стапки со забавено темпо. Јас очекувам ФЕД да ги зголеми каматните стапки за уште 50 базични поени вкупно, двапати по 25, со што ќе се доближат до основната стапка на инфлација во САД. Кај ЕЦБ очекувам дополнителни зголемувања од 75 базични поени“, рече Цветановски во гостувањето на „Блумберг Адрија“.
Тој очекува Народната банка да го следи темпото на ЕЦБ, па прогнозира дека основната каматна стапка би достигнала до 6 отсто.
Што се однесува до зголемената загриженост за стабилноста на банките по превирањата во светот, Цветановски смета дека нема ризик од прелевање на кризата, бидејќи вели дека не станува збор за системски пропусти туку проблемот е во самите банки, односно управувањето со билансите.
„Тоа се сепак на некој начин изолирани случаи, каде што грешката ја лоцирам кај самите банки. Тоа што се случи со СВБ, на пример, можело да се спречи доколку обврзниците со ниски каматни купони ги продавале навремено. Гувернерите на централните банки, и на ФЕД и на ЕЦБ, однапред најавија дека ќе има транзиција кон повисоки каматни стапки. Поентата на тоа најавување е за финансиските институции да преземат соодветни мерки за таа транзиција да ја поминат што побезболно и соодветно да ги реструктурираат своите биланси“, вели Цветановски.
